TOKYO: Aku deka nganti nuan, nadai ngira berapa lama.
Nya meh rambai jaku sebuah poster filem China pasal kisah Hachiko, ukui pemadu taluk ba dunya.
Enti nitih, Hachiko ti sanggup nganti penatai pengempu iya ba stesyen kerita api Shibuya, Jepun udah beumur 100 taun enti iya agi idup.
Hachiko tauka dikangau Hachi, ada kena November 1923 nyadi bakih pengempu iya, Profesor Eizaburo Ueno.
Ueno mega chukup sayau ke Hachiko lalu ngambu baka anak diri empu.
Penaluk ukui baka Hachiko bechura krim ti nganti pengempu iya, Ueno di stesyen Shibuya enda kala padam taja pengudah Ueno midang kena 21 Mei 1925.
Pengidup Hachiko nadai berubah nyentuk iya ditemu parai ba tisi jalai semak stesyen kerita api Shibuya kena 8 March 1935 pengudah 10 taun nganti pemulai pengempu iya.
Kisah penaluk Hachiko ngagai Ueno tu udah dibantai ba bemacham chara baka bup, filem enggau sitkom sains fiksyen.
Pengudah pemarai Hachiko, tugu jelu nya udah didiri ba stesyen kerita api Shibuya ti ditapatka mensia mayuh nyentuk diatu.
Tambah mega, genap 8 April, sebengkah pengawa ngingatka Hachiko diatur ba luar stesyen Shibuya ke alai tugu nya diias ngena scarf, topi Santa enggau sengkabung mua.
