Kitai bedau ulih nitih PKPB

SARIKEI: Sarawak ngaga pemutus ke engkeman lebuh mengkang bejalaika Atur Tagang Pejalai (PKP) ngambi nyaga rayat kelimpah nagang pengerekai igi penyakit Covid-19.

Kaban Parlimen P206 Tanjung Manis, Ir. Yusuf Abd Wahab madah, pemutus nya endang patut lebuh Sarawak agi nagang pandemik ke ulih ngeruga pengerai tu.

Naka diatu ku Yusuf, agi bisi kes positif Covid-19 ba menua tu taja enda mayuh.

“Kitai bedau besedia bejalaika Atur Tagang Pejalai Besyarat (PKPB) laban agi bisi kes positif diripotka Komiti Penyangga Penusah Ngenyit Nengeri (JPBN) ninting hari.

Terang Yusuf, Perintah Sarawak agi bejalaika PKP laban enggaika gelumbang Covid-19 tu nyadi baru baka ba sekeda menua luar.

Iya ngarapka rayat ulih nerima atur tu enggau meretika inisiatif ti dipejalaika Perintah Sarawak ungkup menua tu.

“Pemutus nya digaga ukai deka ngenusahka rayat tang ungkup pemaik semua.

“Berebak enggau nya, aku ngarapka semua piak seruran meri kerejasama enggau nitihka PKP ngambika igi penyakit tu ulih dipunas,” terang iya.