Kitai deka bisi utiliti kelas dunya – Rundi

KUCHING: Pengawa ngelancharka Gis Petroleum (LPG) Petros nentuka bekal gis nadai pungkang, bekualiti enggau likun dikena bala penguna ba menua tu.

Menteri Utiliti, Datuk Seri Dr Stephen Rundi Utom madahka pengawa ngelancharka gis nya nyapai juluk Perintah Besai nengah Petros dalam Ordinan Pengagihan Gas 2016.

Ku iya, Opis Menteri Utiliti nyadi pengatur endang ngelalu enggau deka mantu Petros bejalaika pengawa nyadi agregator gis domestik enggau bejalaika pelin besai gis Sarawak ti begunaka langgur ba mayuh sektor dijapai.

Terang iya, Sarawak bisi pengingin ngembuan infrastruktur ti bekualiti tinggi enggau nyaga rampa menua ngambi nyungkak pemansang ekonomi rama setipak enggau ekonomi digital sereta teknologi gadung manggai taun 2030.

“Kitai deka ngembuan utiliti kelas dunya ke ulih dikeandal, ekonomi, likun enggau tegap ngambi nyungkak ekonomi enggau nyaga pengelantang rayat Sarawak.

“Opis menteri deka neritka atur enggau polisi begulai enggau opis menteri sereta ejensi ngambi nyapai tuju nya.

“Pia mega, nyebela atur bedagang beranakka puku enggau ngaul dalam pengawa ngidar gis menua,” ku iya.

Rundi mansutka jaku nya Pengawa Ngelancharka Gis LPG Petros di Kubah Ria ditu, kemari.