SARATOK: Chek Projek Mit Pemansang Menua Pesisir (MRP) penyampau RM15,000 udah disua ngagai pengari Klinik Pengerai (KK) Nanga Budu, Krian ditu tadi.

Sapit Menteri Pengeluar Kuasa enggau Pengeraja Asal, Datuk Ali Biju madahka tuju agih belanja nya dikena bebelika kereban diguna ba klinik nya.

Ku iya, raban klinik mega tau ngena agih belanja nya ngatur sebarang aktiviti tauka program pulaika pemaik enggau pengelantang semua.

“Kitai sama nemu, peranak ari lebih 50 buah rumah panjai ba menua Batang Budu, Krian Ulu enggau Kabo Ili napatka klinik tu ngulihka servis pengerai.

“Ukai semina nya aja, klinik tu tau dikumbai kitai ‘seput’ ngagai peranak ditu ke nyadi palan keterubah dilawa endur ngidupka diri dulu sebedau dianjung ngagai palan perubat besai agi,” ku iya.

Jaku Ali nya dipansutka Antok Jaya ti ngarika iya lebuh nyuaka chek MRP ngagai Pemantu Pegawai Opis Pengerai, Jefyson Baking ba KK Nanga Budu, Krian ditu tadi.