KUCHING: Opis Menteri Kereja Raya (KKR) nerima agih belanja RM9.511 bilion ba Bajet 2024.
Menteri KKR, Datuk Seri Alexander Nanta Linggi madah, agih belanja nya nambah 12.7 peratus enti dibanding RM8.439 bilion ari Bajet 2023.
“KKR gaga sereta beterima kasih ngagai Menteri Besai Datuk Seri Anwar Ibrahim laban semua inisiatif ti dilanggur KKR dipesetuju ba Bajet 2024.
“Penyampau bajet ngatur ungkup KKR ti dikemendar iya nya RM949.37 juta, nambah 9.72 peratus enti dibanding RM865.27 juta ba taun 2023,” ku iya dalam siti penerang media tadi.
Ku Nanta, bajet ungkup pemansang taun 2024 mega nambah 13.05 peratus ari RM7.573 bilion ba taun 2023 ngagai RM8.561 bilion.
“Pekara tu ngelaika sambung jalai raya ti manah ungkup ngemuntangka pejalai rayat seraya ngelancharka aktiviti raban pedagang enggau pemansang ekonomi rayat.
“Projek infrastruktur jalai raya deka terus diadu baka Jalai Raya Pan Borneo Sarawak ti dipelaba tembu penuh taun baru.
“Kelimpah ari nya, proses tinda bagi 19 pakej projek Jalai Raya Pan Borneo Sabah Renggat 1B pemanjai 366 kilometer ngaul ungkus RM15.7 bilion deka tembu bulan November ti tu ila,” ku iya.
Iya madah, Projek Sarawak-Sabah Link Road (SSLR) Renggat 2 pemanjai 320 kilometer ngaul ungkus RM7.4 bilion deka berengkah dipejalai ujung taun tu.
