KUCHING: Opis Menteri Kereja Raya (KKR) keran nentuka semua infrastruktur jalai ti dikemansang likun enggau lantang kelebih agi penguna ti pulai ke menua serimbai musin pengerami.
Menteri KKR, Datuk Seri Alexander Nanta Linggi madah, pengawa nyeruri fasiliti deka terus dipejalai dikena nyamin pengelantang semua penguna jalai maya Hari Krismas tu.
Iya mega meri Selamat Ngintu Hari Krismas ngagai semua komuniti Kristian ba menua tu.
“Krismas nya musin penuh enggau pengelantang, pengadang enggau penyayau.
“Sama mih kitai mereti ke semangat tu enggau kaul sebakih sereta penyerakup ti nyadi pugu pemansang menua,” ku iya nengah pesan Hari Krismas.
Ku iya, kemisi tu meseti dikena manah begulai enggau diri sebilik ti dikesayau seraya ngarap pengerami tu mai pengaga enggau pengelantang ngagai semua raban orang Kristian.
Nyingkang nuju taun baru, Nanta madah ke KKR meri perati ngagai pengawa bejalaika inisiatif infrastruktur meruan dikena nyamin pengelantang rayat.
Ku iya, KKR keran nentuka rentayan infrastruktur ba tikas pemadu manah
. “Tu nyengkaum nambah kualiti jalai, nyamin pengelikun penguna, ngerumban projek pemansang mensia mayuh lalu tentu ngerembai pengawa ngena aplikasyen MyJalan entara rayat Malaysia,” terang iya.
Nya alai, Nanta ngarap mayuh agi pemujur ti ngemegah ulih diturai taun baru ke pemansang menua. – TVS
