Kluster Jupiter udah punas

KUCHING: Kluster Jupiter ditukuka udah punas pengudah nadai kes baru diripotka ba timuh 28 hari ari kes kepenudi diripot iya nya kena 17 Julai tu tadi.

Komiti Penyangga Penusah Ngenyit Nengeri (JPBN) madah, kluster nya ngaul tiga krew kapal LNG Jupiter nya peranak menua luar ti sangkai enggau dikuarantin ba palan penyangkai kapal Sarawak semak enggau Palan Penyangkai Kapal Bintulu.

“Bisi 35 kaul iya nya 30 krew kapal LNG Jupiter enggau lima ejen serikat kapal udah diperesa.

“Ari penyampau nya, tiga iku tauka 8.57 peratus disidi kena rampit Covid-19 lalu semina kes indeks ti mantaika kelai,” ku penerang nya.

JPBN mega madah, semua kes udah diperubat ba Sepital Bintulu enggau udah suman.

Berebak enggau nya, bisi semilan kluster agi ngerekai ba Sarawak.

Seharitu, nadai kes baru Covid-19 diripotka ba Sarawak ngujungka kes mengkang 681 kes.

“Bisi tiga iku agi diperubat ba wad isolasyen sepital enggau kes pemati mengkang 19 iku tauka 2.79 peratus.

“Bisi 36 PUI diripotka enggau siti kes agi nganti pemutus makmal.

Suara Sarawak