BETONG: Tuai Raban Bansa enggau Genturung Pendiau (KMKK) ditangkan ngambi bejalaika pengawa enggau manah dikena nentuka pengelantang pengidup rayat pegai sida.
Sapit Menteri Raban Nembiak, Lumba enggau Pemansang Orang Dagang Sarawak Datuk Gerald Rentap Jabu madah, KMKK nyengkaum bala pemancha, penghulu enggau tuai rumah nyadi tuai ke megai tanggungpengawa besai ke jematan perintah enggau rayat ba pengawa ngenataika polisi sereta bejalaika agenda pemansang.
Iya bejaku munyi nya maya Program Randau Pemesai Begulai enggau KMKK Renggat Layar Ili di Rumah Panjai Melaban ditu, Hari Minggu.
Ku iya, pemancha enggau penghulu nyaup ngelanggur pemansang, ngatur pekara komuniti sereta bejalaika macham program rayat nyengkaum nengah kerejasama ari Komiti Pemansang enggau Pengelikun Genturung Pendiau (JKKK) sereta Biro Indu.
Iya madah, undang-undang besai reti dikena ba pengidup sereta ngatur pengawa alai bala pemancha enggau penghulu patut nemu undang-undang lebih agi maya ngatur tanah, adat, tikah tauka sarak ti begunaka penemu enggau lalau ari sida.
Kelimpah ari nya, iya bela ngelansa juluk ati penumbuh Pelin Pemansang Udah COVID-19 2030 (PCDS 2030) ti deka meda Sarawak nyadi menua mansang manggai taun 2030.
Ku iya, Perintah Sarawak naka alah nyaup pengelantang rayat nengah macham inisiatif baka meri pelajar tinggi pechuma ba universiti enggi Sarawak kelimpah bantu bukai baka Bantu Barang Diguna Sarawak (SKAS). — EDISI UKAS




