SIBU: Tuai Raban Bansa enggau Tuai Komuniti (KMKK), chairman sereta sekretari Komiti Pemansang enggau Pengelikun Genturung Pendiau (JKKK) meseti ngena teknologi ngambi ngelancharka pengawa sida.

Kaban Kunsil Nengeri (ADUN) Tamin, Ir Christopher Gira Sambang madah, pemansang digital enggau teknologi pemadah (IT) sereta media rama chakah nibar penerang kelebih agi nengah WhatsApp, pesan pandak, emel, aum zoom enggau ke bukai meseti dikuasa tuai renggat baru.

“Aku minta pengelandik ngena IT ditambah agi ba semua raban bekaul.

“Pengelandik tu udah tentu ngemuntang pengawa kita ngatur organisasyen kita empu enggau semitan,” ku iya.

Gira mansutka jaku nya lebuh bejadi Kus Penegap Pengatur enggau Penyedia Minit Aum KMKK enggau Sekretari JKKK Pelilih Sibu Taun 2023 ditu, lemai kemari.

Kus nya diatur Opis Pelilih Sibu, Palan Servis Kunsil Nengeri (DUN) Tamin enggau Unit Pengatur, Opis Premier Sarawak ti digulu urung 74 penyereta.