ROBAN: Komuniti dilalau meri kerejasama enggau sukung tegut ngagai inisiatif Perintah Sarawak ngemansang ekonomi gadung ti siru ke rampa menua.
Kaban Kunsil Nengeri (ADUN) Krian, Friday Belik madah, Sarawak naka ulih negapka penyemela rampa menua enggau bejalaika pemansang pelasarka konsep ekonomi gadung.
Iya madah, pelasar nya beguna amat dikena nentu penyemela rampa menua enggau ngurang tikas pengamah.
“Nya alai, kitai ngarap komuniti meri sukung tegut ngagai inisiatif Perintah Sarawak tu dikena ngemansang ekonomi gadung ti siru agi ke rampa menua.
“Kebuah pia laban inisiatif enggau sukung tu deka nyendia pelasar dikena negapka agi pemansut penatai pemisi nengeri tu dikena nambah penatai pemisi ungkup bejalaika aktiviti pemansang di menua pesisir,” ku iya.
Friday mansutka jaku nya rambau pengawa nutup Program Penyedar Rampa Menua Begulai enggau Komuniti ti diatur Kaunsil Pengeraja Asal enggau Rampa Menua (NREB) di Rumah Jembu, Rantau Sukat, Kedoh ditu, kemari.
Iya nyemetak madah, komuniti ngesan pangku pengawa besai meri kerejasama enggau mantu ngemujurka inisiatif perintah.
“Kelebih agi dikena nentu pemeruan rampa menua ungkup pengelantang enggau kualiti pengidup ti manah agi,” ku iya.
