Konsert Materpiece MKB: Ngubat pengelengau peminat

Mujur nerima penatai urung 1,500 iku orang ti meda Konsert Masterpiece 1Dekad Merindang Ke Bintang (MKB) raban nya chukup temegah laban ulih ngubat pengelengau raban peminat ngagai konsert rock Iban.

Masterpiece mujur bejalaika Konsert Masterpiece 1Dekad MKB beserimbai enggau 10 taun pengada album MKB kena 7 Disember tu tadi ba Stadium Tertutup Sibu.

Ku vokalis Masterpiece, Aldrine Phillie tauka tebilang dikangau Depha bala pengatur, bisi nyelak tikit baru laban kasih ke bala peminat ti deka meda.

“Sambut ari bala peminat chukup manah lalu aku gaga laban ulih ngubat ati sida ti lelengauka muzik-muzik rock Iban kelebih agi lagu Masterpiece empu,” ku iya lebuh dirandau Suara Sarawak, kemari.

Ku iya, raban pengatur mega bisi ngangau artis-artis Iban bukai dikena ngerami malam nya.

“Entara sida nya Karen Libau, Lucy M, Eyqa Saiful, Nai Dinamik, Taju Remaong, Tamang Raja enggau mayuh agi.

“Artis ngepunka konsert maya nya D’Crystal enggau Watt Rock,” ku iya.

Tambah Depha, dikena meri elemen ngenyit ngagai bala peminat dia Masterpiece bisi belagu duet enggau Josephine Jurie mai lagu Diva Enigma sereta Lyssa Jean mai lagu Siku Dalam Seribu.

“Konsert nya mega disukung kompeni rikoding menua kitai empu baka Pangau Buluh Pengerindu (PBP), Raban KMP, Allen Tinggi enggau ke bukai.

“Enda tinggal maya raban kami ngetu belelak enda lama, bala ti bisi datai diperindang dua penyanyi indu Iban tebilang iya nya Winnie Albert enggau Josephine Jalin.

“Tu pekara ti chukup meri pengaga ngagai kami laban konsert tu bisi mandangka kualiti ari sukut sistem bunyi (sistem bunyi) enggau perengkaguna ba stadium,” ku iya.

Iya sekali agi meri besai terima kasih ngagai raban pemeri belanja TGF Cosmetics Sarawak sereta pengatur Konsert AMG Event Management enggau MO Couture Sarawak.

“Pia mega, meri besai terima kasih ngagai semua raban ti udah bebendar merambu sereta ngatur konsert MKB ngambika nadai penanggul lalu ulih nyadi nyata.

“Ngagai bala peminat ti bisi datai, kami arapka kita semua sama bepuas ati sereta meruan nyukung industri muzik kitai Iban,” ku iya.

Tambah Depha, Masterpiece deka ngeluarka lagu baru enda lama agi ti dikumbai ‘Redak Seribu’.
“Tu perais ari Masterpiece ngagai peminat ti enda putus nyukung laban ketegal sida Masterpiece agi meruan dalam industri muzik tu,” ku iya.

MKB kala nerima Anugerah Muzik Dayak (AMD) iya nya Group Pemadu Popular, Video Muzik Pemadu Manah, Kulit Album Pemadu Manah, Artis Baru Pemadu Manah enggau Album of the Year.
Album MKB suba dirakam ba studio Masterpiece empu iya nya ‘Masterjam Studio’ ba Sibu lalu sekeda track lagu dirakam ba Studio Fish Farm Record, Kuching.
Ketegal sambut ti manah ari peminat album MKB dichelak dua kali dalam CD, VCD enggau DVD iya nya keterubah ari Masterpiece empu sereta kedua Masterpiece begulai enggau Panggau Buluh Pengerindu, studio Embat Lala.

Suara Sarawak