MARUDI: Pengawa bejalaika projek jalai besai nengah Projek Pemungkal 2 (KOP 2) disadang nyadi penyungkak transformasyen pemansang menua pesisir di Baram nengah pengawa ngedut takah akses entara mengeri enggau menua ulu.
Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, projek ngaga jalai Miri-Marudi, Marudi-Mulu enggau Long Panai-Long Lama deka meri empas besai ngagai peranak lokal kelebih agi ari sukut timpuh pejalai enggau akses ngagai fasiliti pemun.
“Pengawa bejalaika projek tu mandang komitmen betampung Perintah Sarawak negap rentayan infrastruktur menua pesisir kelimpah nentuka pemansang ti sebela agi entara mengeri enggau menua pesisir.
“Nya alai, pakej KOP 2 tu ngaul pengawa ngaga jalai baru sepanjai 6.25 kilometer (km) ari simpang Puyot ke Sungai Kalijau nitih standard Opis Kereja Raya (JKR) R3 lalu pengawa meresi taba udah berengkah dipejalai kenyau ari bulan Februari tu tadi,” ku iya.
Gerawat bejaku munyi nya rambau Program Nasih Tanah Projek Jalai MMMLL: Pakej 2 Renggat 1 (Projek Pemungkal 2) ditu, kemari.
Tampung iya, projek nya napi pemar geografi nyengkaum gaya tanah kerapa ti tebal enggau enda tentu sereta risiko bah lalu nya begunaka pelajar injiniring ti silik enggau inovatif agi.
“Entara chara ti diguna nyengkaum ngaga parit bediri pasang tembu (PVD) dikena ngerumban pengawa muai ai ti ngandang dalam tanah.
“Pia mega, pengawa ngaga jalai beringkat deka dipejalai ba renggat pengudah tu nengah pakej sebaka dikena nentuka penegap struktur ba genturung tanah kerapa ti enda landai nya,” ku iya.
Nerang silik, ku iya, peranak lokal nadai pilih bukai kelimpah nengah jalai balak ti chukup jauh iya nya nengah jalai ke Long Linei lalu melunggang ke Simpang Puyot enggau genturung Sungai Kalijau.
“Jalai tu ukai semina bingkuk enggau enda likun ditengah tang begunaka timpuh ti panjai sereta berisiko tinggi enti hari ujan.
“Nengah pengawa bejalaika projek tu, timpuh penjalai sebedau tu ti begunaka awaka urung 72 minit deka dipandak nyadi 12 minit aja.
“Tu mega deka nambah pengelikun, pengelantang enggau pengelanchar mobiliti peranak ninting hari,” terang iya.
Iya nyemetak madah, projek nya deka nyambung genturung menua ulu enggau rentayan jalai besai kelimpah nambah bungkur pemansang nengeri.
“Kelimpah ngemandak taga pejalai, projek tu disadang ngerandang akses ti besai agi ngagai servis pelajar, pengerai enggau peluang ekonomi ngagai komuniti lokal,” ku iya.
Pandak jaku, inisiatif nya ukai semina meri perati ngagai pemansang infrastruktur aja tang siti pengawa meranak puku timpuh panjai dikena ngangkat kualiti idup rayat sereta meransang pemansang sosioekonomi di menua ulu Baram. – TVS
