KPDNHEP benung mansik kompelin pasal minyak digulai ai

“Nyema pekara tu endang dikereja, lisin pengempu stesyen nya deka dikinsil piak opis menteri.”

KUCHING: Opis Menteri Dagang Dalam Menua enggau Pekara Bebelika Barang (KPDNHEP) benung mansik kompelen ti diterima ari mensia mayuh bekaul enggau petrol ti digulai ai bisi nyadi di sebuah stesyen minyak Shell Jalan Urat Mata, Kuching.

Sapit Menteri Dagang Dalam Menua enggau Pekara Bebelika Barang (KPDNHEP), Chong Chieng Jen madah pemesai penerit adat opis menteri nya udah ngambi atur pasal kompelen nya lalu asil pansik deka dibantaika enda lama agi.

Chieng Jen madah, atur ngagai stesyen minyak nya bepanggai ba asil pansik nyema penanggul nya endang dikereja tauka enda.

“Ke diatu, semua pam minyak (pam 1,2,3,4,5,6,7,8,10,11) udah ditutup laban deka bejalaika pansik ti silik.

“Nyema pekara tu endang dikereja, lisin pengempu stesyen nya deka dikinsil piak opis menteri,” ku iya nerang.

Chong madahka pekara nya lebuh datai ngagai Pengerami Aidilfitri 2019 di Kampung Haji Baki, malam kemari.

Bisi empat bengkah kompelen diterima bekaul enggau kes tu nyentukka sehari tu.

Lebuh bejaku, iya madahka kerejasama tegut entara rayat enggau bala ketuai beguna amat dikena nangkup semua peminta rayat sereta perambu ungkup rayat ulih diatur ngambika ulih meri pemaik ngagai semua.

Ba pengerami ti sama, iya mega nyuaka bantu hari raya ngagai orang tuai sereta orang ti kurang penatai pemisi.

Pengerami malam nya ditaja Serikat Buraq Oil Sdn Bhd ari Kuala Lumpur.

Pengatur Pengawa Besai Buraq Oil, Mohd Khairul Anuar Abdul Latif enggau lebih 300 iku peranak ngelingi Kampung Haji Baki bisi datai ngagai pengerami nya.

Chong Chieng Jen

 

PENGINGAT… Bala penguna ngambi gambar nyadika pengingat enggau Sapit Menteri Dagang Dalam Menua enggau Pekara
Bebelika Barang (KPDNHEP), Chong Chieng Jen.

Suara Sarawak