KUCHING: Opis Menteri Pemansang Indu, Nembiak Mit Enggau Pengelantang Komuniti (KPWK) nyelinting deka nyapai 99 peratus nembiak ba nengeri tu nerima akses pelajar tumu nembiak mit dalam taun 2024.
Menteri nya, Datuk Seri Fatimah Abdullah madahka naka taun 2023, penyampau nembiak ti bulih akses pelajar tumu nembiak mit udah manggai 98.71 peratus.
“Pekara ti deka diselinting kami nengah Kaunsil Pemansang Tumu Nembiak Mit Sarawak (MPAKS), kami deka nentuka semua nembiak Sarawak bisi akses ngagai pelajar tumu nembiak mit.
“Diatu ari sukut penyulut kami naka taun 2023 ba sukut akses nya, kitai udah ulih nyapai 98.71 peratus nembiak primari satu nerima pelajar tumu ba Tadika enggau Taska,” ku iya.
Fatimah nerangka pekara nya rambau aum pemberita pengudah nyadi chairperson Aum MPAKS di Begunan Baitulmakmur II ditu, tadi.
Ku iya, penyulut tu tinggi agi ari tikas nasional ba sukut akses pelajar tumu nembiak mit ti semina 88.81 peratus.
“Diatu kami deka ngemanahka agi tikas penyulut dijapai ari 98.71 peratus ba taun 2023 ngagai 99 peratus ba taun 2024.
“Kami mega deka numbuhka sebuah komiti khas ungkup nungkap akses tu ngambi ulih berati ni bagi pekara ti patut dikemanah, nama kebuah, dini enggau pekara bukai.
“Kami udah nya ngiga dini pengelemi ba pengawa ngerembaika akses pelajar tumu nembiak mit nya kelebih agi ba renggat Tadika awakka takah nya ulih dikemanah ngagai 99 peratus,” ku iya.
