KSC – Perkeso besaup mantu  raban ti putus pengawa

KUCHING: Kuching Skills College (KSC) nguji mantu raban ti putus pengawa tauka kena buai kereja ketegal pangka pandemik Covid-19.
Ketuai Pegawai Eksekutif KSC, Novert Sullang madahka inisiatif mantu raban diselinting dipujur nengah kerejasama Serakup Pengelikun Pengereja (Perkeso).
Ku iya, kolej sida udah diaku Pekerso bejalaika kus Certified Drones Operational Aerial Surveillance Proficient (CDOASP) di baruh Pelin Nyungkak Baru Ekonomi Menua (Penjana) ungkup raban diselinting nya.
“Kus dipejalai nengah Program Insentif Ngambi Pengereja enggau Bantu Latih serak tu udah digulu tiga iku ke datai ari Miri enggau Kuching.
“Sida tiga tu nerima nasip ke sama tang kitai naka ulih mutarka sida nengah latih enggau peluang kereja ke bisi,” ku iya lebuh dirandau Suara Sarawak.

BELAJAR TEORI DULU… Sida tiga ke ngambi kus diajar teori dulu sebedau praktikal nerebaika dron.

Novert madah, kus lima hari berunggu berengkah ari 18 Januari nyin tadi lalu tembu sehari tu endang nyelinting pengereja ke napi penanggul pengudah kena buai kereja.
Ke penerang, sida tiga ke nerima latih nya Axavier Evans Anak Valentine Limang ari Kuching seraya Corinthians Tom Anak Malaysia enggau Kelly Anak Entap bela datai ari Miri.
Alvin Chai, siku pematih ke ngembuan mayuh peneleba ba kus nya enggau diaku di Sarawak udah dilempaika tanggung pengawa matih sida tiga nya.
Sida tiga mega bisi diberi elaun sekumbang ke ngulu kus lima hari berunggu ke diatur ba KSC ditu.
Mayuh penemu sentang teknologi dikunsi enggau bala penyereta kelimpah ari sanding penemu pasal pengawa puang ke bisi disedia dalam sektor bekaul.
Berita penuh Ruai 5 pagila
PERATI MANAH… Setiap komponen dron diperesa dulu ungkup pengelikun.

 
PRATIKAL… Corinthians, Axavier enggau Kelly benung dilatih nerebaika dron.