KUCHING: Pengawa ngemanah kualiti pengatur trafik langit ulih mantu ngerembaika industri penerebai bilun ba Sarawak ti meruan agi.
Sapit Menteri Pengangkut, Datuk Hasbi Habibollah madah, perintah udah setuju ngemanah enggau nyeleti sistem patau trafik langit dikena nambahka tikas pengelikun penerebai mensia mayuh enggau pengulih operasyen padang bilun.
Ku iya, nya nyengkaum pengawa masang sistem radar (radar besai enggau kedua), sistem patau enggau penyauh sereta kereban nunjuk tunga tuju nengah Projek Nganti enggau Ngemanah Sistem Pengatur Trafik Langit ba Wilayah Pekara Penerang Penerebai Bilun Kota Kinabalu (Kota Kinabalu Flight Information Region – KKFIR) ti mungkur Sabah enggau Sarawak.
“Ba baruh skop projek KKFIR tu, perintah udah ngemendar enggau nyeleti tikas sistem trafik langit nengah pengawa masang kereban trafik langit baka Primary Surveillance Radar/Secondary Surveillance Radar (PSR/SSR) enggau Automatic Dependent Surveillance-Broadcast (ADS-B).
“Projek KKFIR tu dipejalai ba baruh Langgur Pemansang Malaysia Lumpar Ke-11 (RMK-11) beungkus RM183 juta ti dikeandal deka ngemanahka semua rentayan sistem patau radar kelebih agi bungkur radar ba Kuching enggau ruang langit selampur Sarawak,” ku iya.
Hasbi bejaku munyi nya rambau bejadi Operasyen Radar ba Kuching ba baruh projek KKFIR ditu, kemari.
Ku iya, Padang Bilun Antarabansa Kuching (LTAK) siti ari enam padang bilun ti ngembuan status antarabansa ba Malaysia ti nyadi palan keempat pemadu kiruh pengudah Kuala Lumpur, Kota Kinabalu enggau Pulau Pinang.
Iya madah, perengka pengangkut langit nyadi entara mod pengangkut pemadu diguna ba Sarawak lalu LTAK ngatur urung 34,534 penerebai bilun nitih rikod nyentuk 30 September tu tadi iya nya 2,574 penerebai antarabansa enggau 31,960 penerebai dalam menua.
