Kubu Ranee patut dikemanah baru

Kubu Ranee didiri ba siti bukit ke tinggi besemak enggau Batang Krian. Maya agi nadai jalai alun kelia, Batang Krian tu mih jalai penyambung ditengah mensia mayuh lebuh ke mindah ngagai sebarang endur.

Nyadi ba bukit ti nunga sungai tu mih Kubu Ranee didirika perintah koloni ngambika nyamai matahka serang raban pengayau ti nguji ngalahka perintah maya nya kelia.

Ari Kubu Rannee kediatu mega ulih meda ulah mensia ke bisi beteregap ba Pasar Saratok.

Begunan ke pemadu tuai ba Saratok tu diatu beumur 132 ke taun kala nyadi Opis Pelilih Saratok.

Diatu Opis Pelilih tu udah mindah ngagai opis baru sepiak Sekula Primary (SK) Abang Abdul Rahman.

KUBU RANEE….Sebedau angus.

Kubu Ranee angus

Pagi kena 9 Ogos 2020, Kubu Ranee kena tuntung penusah angus taja pia penusah nya mujur dirara asil penyikar raban Bomba enggau Penyah Penusah Saratok.

Mensia mayuh ti benung bebelika barang nyerumba ujung minggu nyau begau laban penusah nya.

Kaban Kaunsil Nengeri (Adun) Kabong, Mohd. Chee Kadir lebuh dirandau Suara Sarawak bekaul enggau penusah nya madah arapka udah tu begunan sejarah nya dikemanah baru lalu patut dijaga enggau likun.

“Genap iti palan ti bisi bekaul enggau sejarah lebih agi baka Kubu Ranee enti nitih mesti diintu enggau manah.
“Iya (Kubu Ranee) mega patut diseleti enggau manah ngambi awakka palan nya seruran meruan sereta ulih ditapat bis dipeda rebak baru jemah.

“Enggau nya,rebak baru jemah nyangka ulih nyamai agi nemu tauka belajar senentang sejarah asal ti bekaul enggau menua penatai asal diri empu,”ku iya.

Gaga baru

Nangkan nya, Chairman Parti Demokratik Progresif, Krian,Jeffry Jimbun Walter Kidang,38 taun minta perintah regas agi bejalaika atur ngaduka baru Kubu Ranee ke udah angus.

“Genap begunan ti ngembuan sejarah patut suah diperesa sereta bisi orang nyaga awakka iya semampai likun.
“Ambika chunto,piak bekaul ulih bekerejasama enggau piak Rela tauka ngaji Jaga (Security Guard) swasta nyaga pintu penama ngambi bisi ngemata lalu meresa genap iku mensia ti datai kia,” ku iya.

Pia mega Ketuai Balai Bomba enggau Penyah Penusah Saratok,PPgB Nazry Mohamat madah sida maya penusah nyadi sigi tekenyit.

Pengudah ninga berita nya sida ke bepalan urung 10 KM ari penusah nyadi terus berumban ngesah.

Enam iku bomba betuaika PBK II Yusof Bin Tamin mujur ngerara sereta nagang api ari nyerarai ngagai alai bukai.
Ungkup penerang,kira seminggu sebedau penusah angus nyadi Bilik Aum Ketuai Raban Bansa ba ringkat baruh begunan nya mega kala kena serungkai ngujungka cheremin jenila bisi pechah.

Kubu Ranee digaga siku pengereja pengawa jeman pegai perintah koloni benama Maxwell taun 1888,nangkan Kubu Charles sereta diberi nama’Ranee’ dikena ngingatka gelar pemadu tinggi ungkup bini rajah jeman nya suba tauka kemaya hari disebut kitai Indu Keterubah (First Lady) tauka Bini Ketuai Pemegai Menua.

SAYAU…Gaya begunan dipeda ari luar pengudah api mujur dirara bomba. 

 

RETUNG…Semua kereban ba siti bilik lengis empa api.

 

PECHAH…Kerimpak cheremin keberai ba kaki lima Bilik Aum Ketuai Raban Bansa seminggu sebedau angus.

Suara Sarawak