KUCHING: Bagi Menua Kuching nyengkaum Bau enggau Lundu ditukuka Zon Mirah (Red Zone) kena rampit igi penyakit rabies lalu igi penyakit nya ditaga jampat ngerekai.

Opis Menteri Pengerai Bagi Menua Kuching dalam kunsi Facebook madah, nya alai mensia mayuh dilalau jampat nganjung diri ke klinik pengerai tauka sepital enti sema bisi kena ketup, keramak enggau didilat ukui tauka mayau.

“Bisi orang nanya ba WhatsApp, amai mayau ulih kena rabies? Saut iya, amai.

“Ukai ukui aja ulih kena rampit rabies, mayau pen bisi kena rampit laban semua bansa jelu ti bisi darah angat ulih dirampit rabies,” ku penerang nya.

Tandu penerang nya, raban opis pengerai mega mekat mensia mayuh ti diketup tauka dikeramak mayau ngambi nganjung diri ke klinik taja pen abi ketup tauka keramak nya mit.

“Datai aja ngagai klinik perintah ngambi lutur ulih meda sereta ngaga pemutus deka meri vaksin tauka enda.

“Vaksin diberi ngagai kita pechuma aja.

“Nya alai, padahka pekara tu ngagai bala bakih, ruang bilik enggau semua orang ngambi kitai semua ulih nyeliah diri ari kena rampit rabies,” ku penerang nya.