KUCHING: Mengeri Kuching deka nyadi tuai rumah ngatur Aum Mengeri Kreatif UNESCO ungkup pengawa gastronomi taun baru.
D a t u k Bandar Kuching Selatan, Datuk Wee Hong Seng madah, pemutus nya digaga pengudah Kuching mujur ngalahka Turki ungkup ngulih hak ngatur aum nya.
“Kitai besemekih enggau Turki lalu pengawa ngundi diatur di Mexico lalu Kuching mujur bulih hak ngatur aum tu ungkup sekali tu,” ku iya.
Wee bejaku munyi nya rambau Pengerami Makai Lemai Ninting Taun Majlis Bandaraya Kuching Selatan (MBKS) ti dipenyadi Sapit Premier Sarawak, Datuk Amar Dr. Sim Kui Hian ditu, malam kemari.
Nya alai, ku iya, aum nya deka mantaika penyelai pesaka kulinari Kuching sereta negap penuduk mengeri nya nyadi palan gastronomi tikas antarabansa.
Ba lansa bukai, iya madah, MBKS mega deka meri perati ngagai inisiatif nambah servis mengeri nyengkaum timpuh meri timbal, pemeresi, nyeruri taman enggau nerit atur.
Dikena ngumpul timbal mensia mayuh, ku iya, kod QR khas deka dilanchar dikena meri peluang ngagai peranak meri buah penemu sida nengah pom tali arus kelimpah mantu MBKS nambah kualiti servis sida.
Wee bela ngemerat sekeda pekara besai ti diberi perati MBKS ba taun 2026 nyengkaum negap inklusiviti nengah projek baka Ausome Park, Bank Uras, Mengeri Siru Ke Nembiak Mit sereta Mengeri Siru Ke Orang Tuai.
“Pia mega, kitai deka nyukung pengerembai ekonomi nengah pengawa nentu Kuching Selatan semampai beresi, tegap sereta siru ke dagang.
“Seraya nya, kitai deka beranakka puku ba pemansang pengulih dalam nengah latih, pemansang penau nyadi tuai enggau kerejasama beraban,” terang iya.
