MATU: Projek ngaga Jalai Kampung Bawang ditu ti berengkah lebih empat taun llu diketu pengudah puntan tembu digaga kunteriktor taja udah berapa kali timpuh dilanjar diberi.
Sapit Menteri ba Opis Premier Sarawak (Integriti enggau Ombudsman) ti mega Kaban Kunsil Nengeri (ADUN) Jemoreng, Datuk Dr Juanda Jaya madah, projek nya udah lama dikategori projek bepenanggul tauka projek sakit.
“Projek tu dikategori projek penanggul lalu semua pengawa nyelamat ti udah dipejalai sebedau tu puntan.
“Taja projek udah manggai 81 peratus, kunteriktor agi puntan ngaga projek tembu nitih timpuh ditetap taja udah suah diberi peluang,” terang iya.
Juanda nyebut pekara nya lebuh ngatur pejalai ngabas taba projek meda status pemadu baru projek ngaga jalai nya di Kampung Bawang empai lama.
Iya madah, projek nya enti nitih tembu dua taun ke udah nunda taga asal, tang pengawa laun belama udah meri empas enda manah ngagai peranak dia.
“Jalai Kampung Bawang nya infrastruktur beguna ngagai peranak ukai semina nyadi jalai alternatif ti manah agi, tang ulih ngurang risiko endur nya ampuh ti nuntung ninting taun.
“Kelimpah ari nya, jalai nya mega disadang ulih ngemuntang pengawa ngereja tanah baru ti ulih meri pemaik ngagai peranak ari pemansang dipejalai sereta nambah aktiviti ekonomi dia,” ku iya.
Berindik ari nya, Juanda madah ke Opis Kereja Raya udah meri surat ngetuka kunterik ngagai kunteriktor pun Januari 2026.
Iya ngarap ke proses tinda baru ulih dirumban ngambi projek nya ulih digaga laban rayat di Kampung Bawang begunaka jalai ti meruan.
“Projek tu perengkaguna rayat lalu aku ngarap ke proses tinda baru ulih dirumban ungkup pengelantang peranak ditu,” ku iya nyemetak. Sama datai, pengari JKR Mukah, Awang Dasuki Awang Dol sereta Penulung Pegawai Pelilih Matu, Zaraina Sahari. – EDISI UKAS
