KUCHING: Perintah Besai dipinta berunding chara khas ba kuota meli diesel di Sarawak ketegal pemar geografi sereta utai diguna peranak menua pesisir enggau menua ulu ke bebida enggau nengeri di Semenanjung Malaysia.
Sapit Premier Sarawak, Datuk Amar Awang Tengah Ali Hasan madah, tatak meli diesel ke ditetap diatu patut diserenih baru lebih agi ngagai peranak ba menua ulu ke ngerenchah pejalai jauh ngulihka bekal bahan api.
Ku iya, bisi peranak ba menua ulu nyau mayar ungkus pejalai ke mar ngelawa stesyen minyak pemadu semak, tang semina dikemendar meli naka 100 liter diesel ba tetiap transaksyen.
“Ambi ke chunto di Bario, endur ngelawa stesyen minyak pemadu semak nyau 15 jam pengelama, nya alai kitai patut berunding pekara ke nyadi di Sarawak.
“Aku ngarap ke ulih berunding dikena mantu rayat ke diau ba menua nya,” ku iya.
Awang Tengah nyebut pekara nya lebuh dirandau pemberita pengudah ngetuai ke Aum Raban Penguna Nengeri (GPN) Sarawak ditu, Hari Satu tu tadi.
Berindik ari nya, iya minta pekara nya diberi perati khas ungkup Sarawak kelebih agi ba menua ke agi bepanggai ba injin api ke bekal kuasa karan sereta ngena injin sepit nyadi pengangkut ti begunaka diesel.
Berebak enggau nya, iya madah ke aum nya mega berandauka sebana penguna diterima sepanjai taun tu sereta pengawa deka dipejalai belalauka ripot nya.
Ku iya, aum bela mantaika ripot meresa ba premis dagang enggau stesyen minyak, kelimpah nerima penerang pasal Polisi Penguna Menua 2.0 sereta Sistem Nyaga Diesel Besubsidi.
Ngenang pekara sama, iya madah, GPN Sarawak deka chakah agi meri penerang ngagai peranak dikena nambahka pemereti ati pasal pejalai subsidi, nyengkaum chara minta enggau proses ngulihka bantu ke bisi.
“Tu beguna endar laban enti nadai penerang ke betul, rayat deka napi pemar mereti ke bantu ke bisi.
“Nya alai, pekara tu deka majak chakah dipejalai laban kitai deka nyeridi, matih enggau nambah penemu bala penguna pasal hak sida nyadi penguna,” terang iya.
Iya mega madah, pekara penerit atur deka majak ditegap nengah kerejasama rat entara mayuh ejensi kelebih agi mutar isu limpang ke bukai ti patut diputar jampat.
Iya nerang, penyeraris entara ejensi beguna endar dikena ngenegapka pengawa nerit adat enggau enda bepanggai ba Opis Menteri Dagang Dalam Menua enggau Belanja Idup (KPDN) nagang sebarang pengawa ti salah.
Sama datai, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh, Kepala Polis Sarawak, Datuk Mohamad Zainal Abdullah, Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED), Datuk Seri Naroden Majais, Sekretari Mendam MINTRED, Datuk Lester Matthew, Direktor KPDN Sarawak ke mega Chairman GPN Sarawak, Matthew Dominic Barin, raban Residen Bagi Menua sereta raban tuai opis. – EDISI UKAS
