KUCHING: Opis Menteri Dagang Temuai, Seni enggau Main Asal Sarawak setuju melanja pengawa numbuhka Kursi Pansik Pehin Sri Adenan Satem di Universiti Putra Malaysia (UPM) Kampus Bintulu.
Menteri iya Datuk Seri Abdul Karim Rahman Hamzah madah, agih belanja keterubah numbuhka kursi nya udah dikemendar iya nya penyampau RM2.54 juta pengelama tiga taun.
“Ba renggat opis menteri, aku temegah enggau Kampus UPM Bintulu lalu ngarapka palan penerang pasal Etnik Borneo tu ulih dijapai,” terang iya.
Karim mansutka jaku nya ba Pengawa Bejadika Aum Besai Entarabansa Sains Sosial dan Kemanusian 2021, ensanus.
Ku Karim, inisiatif nya deka nempa pekara baru di Sarawak lalu nentuka nama baka Tok Nan nyadi ikon dalam pansik etnik di Sarawak.
“Nengah institusyen tu, aku ngandalka pengelandik ke diatu ulih mantu opis menteri enggau Perintah Sarawak ngumpul pesaka ke apin diserungkai tauka dibantai ngelama tu,” terang iya.
Ngelansa silik, Karim madah penerang pasal komuniti Borneo mega deka mantu ngerembaika agi pansik pasal etnik Borneo nengah pengawa numbuhka Kursi Pehin Sri Adenan Satem tu.
Nya kebuah, iya ngarapka agih belanja ari Perintah Sarawak ulih dikena bejalaika pansik kelebih agi pasal pemansang komuniti Sarawak.
“Pengawa bejalaika pansik tu mega deka meri malin ngagai Perintah Sarawak ngelanggur polisi menua tu,” ku iya madah baru.
Nambahka nya, Mandal Chanselor UPM Profesor Ir. Dr. B.T. Hang Tuah Baharudin madah, Kursi Pansik Pehin Sri Adenan Satem mega nagit deka nempa penerang ti engkeman pasal etnik Borneo.
“Pekara tu deka nyadi malin bejalaika pansik ungkup sida ken gaga polisi di Sarawak ukai semina maya tu tang dudi hari ila.
“Nya alai, aku meri besai terima kasih ngagai opis menteri enggau Perintah Sarawak laban bejalaika inisiatif tu.
“Ukai semina nyendiaka agih belanja bejalaika pansik tang mega ngagihka belanja urung RM200,000 ungkup sekularship nembiak etnik Sarawak ti deka nampung pelajar ngagai UPM,” ku iya.
Ku iya, opis menteri dipegai Datuk Seri Abdul Karim mega setuju nganjung empat iku nembiak nampung pelajar tikas Masters enggau PhD.
“Sida deka belajar pasal raban etnik di Sarawak,” ku iya madah baru.
Ungkup rikod, Kursi tu deka betuaika Profesor Madya Dr. Mohamad Maulana Magiman ke mega pakar dalam bidang antropologi di UPM Kampus Bintulu.
Nengah Kursi Tok Nan ini, UPM Kampus Bintulu deka ngaga palan penerang bekaul etnik Sarawak dalam bidang budaya, seni enggau pesaka asal.
Pia mega, bemacham chara bejalaika pansik baka nengah Jurnal dalam Jaku Melayu enggau Jaku English tikas entarabansa, nyelak bup enggau dokumentari ari pansik ti dipejalai pengelama tiga taun.
