KUCHING: Kolej Vokasional Kuching (KVK) mujur mai pulai Anugerah Pirak enggau Anugerah Engkeraju ba Pekit Inovasyen Antarabansa Indonesia Ke-11 2024 ti diatur ba Bali kena 28 nyentuk 31 Ogos tu tadi.
Pekit nya diatur Opis Menteri Pelajar enggau Main Asal Indonesia nengah kerejasama Palan Penyulut Nasional Indonesia sereta Gerempung Ngelakuka Inovasyen enggau Pengawa Nempa Indonesia.
Kededua anugerah nya mujur diulihka penyereta KVK ba Kategori Pemakai enggau Kulinari ungkup penyereta ti beumur 18 taun enggau tuai agi ari nya ba baruh embing dua pengelicha KVK iya nya Albert Tajo Miva enggau Tang Tien Mee.
Albert madah, Anugerah Pirak diulihka Wardina Batrisyia Nasib enggau Syamimi Yasmin Yusri lalu Mohammad Firdaus Roslan, Nik Afiq Nik Mohd Azan enggau Hans Christopher Franklin Stephen bulih Anugerah Engkeraju.
Ku iya, seduai ransing mangku pengawa besai nentu produk ti diasilka penyereta KVK ulih nyapai standard inovasyen ba pekit nya.
Berebak enggau penyulut nya, iya beterima kasih ngagai Direktor KVK, Ts. Dr. Lim Ah Juan, Sapit Direktor Akademik KVK, Augustine Tie Sing King, Sapit Direktor Sukung Akademik KVK, Thomas Reddy sereta Tuai Jamin Kualiti KVK, Muhammad Hafiz Seli Abdullah.
Pia mega, iya bela beterima kasih ngagai Opis Pelajar Nengeri Sarawak, Opis Menteri Inovasyen enggau Penau Sarawak, Kemuncak Resources Sdn Bhd sereta Pludec Stones & Construction ti bela nyukung enggau melanja tim nya.
