Lagu Meno’ kena mantupka pengelengau ati

KUCHING: Lagu Meno’ disadaka Alena Murang diatu udah dipeda lebih 9,000 ba Youtube Alena Murang taja baru enam hari dikeluar ba Youtube iya.

Ke penerang semua, ba jaku bansa Kenyah, Meno’ tu mai reti asai lelengau ngagai orang bukai.

Alena, anak Dayak Kelabit ari Sungai Baram, Sarawak mulaika kenang lebuh aki ini sida kelia suah mindah jauh laban deka nurun bedaja ke Miri.

Ku Alena, aki ini sida kelia suah mindah ngena perau panjai ngerenchah sungai lalu diau bemalam dalam kampung.

Ba rantau jalai neresa kampung nya, sida sama nyadaka lagu ‘Belian Meno’ ke alai leka jaku Meno nya mai reti lelengauka orang ke nadai dia.

Jaku Kenyah ba Sarawak enggau Kalimantan entara pugu jaku Austronesia ke majak punas.

“Berapa taun ke udah, aku suah nemuai ngagai menua luar lalu aku deka nyadaka lagu tu ba atas panggau.

“Lebuh nyadaka lagu nya, aku suah bemuaka bala di rumah panjai enggau menua asal aku ke tanda lelengau ke sida,” ku Alena.

Pia mega, Alena suah nebah sape enggau belagu ba pengerami besai di serata dunya dataika iya chukup tebilang dikumbai penebah sape.

Entara panggau ti kala endur iya merindang iya nya baka ba Pengerami South by Southwest USA, Førde Traditional, Pengerami Muzik Dunya di Norway enggau Pengerami OzAsia di Australia.

LEKA Lagu Meno’ dikunsi Alena nengah ruai Instagram iya. Gambar ari Instagram Alena Murang.

SINGLE KEDUA

“Diatu, aku diau ba Kuala Lumpur tang aku enda nyangka sereta berasai sinu laban enda ulih pulai ke menua taun nyin kemari,” ku Alena.

“Enti ngelama tu, aku pulai ke menua abis nadai dua kali setaun betemu enggau kami sebilik, ngaga pansik, ngereja bemacham pengawa asal kitai.

“Berasai chukup lelengau laban taun nyin kemari enggau taun tu enda ulih mulaika diri bala selama.

“Tang, kitai enda tau enda nyaga pengelikun diri enggau diri sebilik ngambi enda kena rampit igi penyakit Covid-19 kelebih agi ba kandang menua ulu.

“Leka lagu tu engkeman amat didinga lebuh kitai bela lelengauka bala di menua laban ke enda ulih mulaika kediri maya menua agi napi pengerekai Covid-19 tu.

“Nya alai, leka lagu tu manah amat didinga kena madahka pengelengau ngagai diri sebilik laban kitai diatu enda ulih begempuru sereta betemu baka selama,” ku Alena ngenang sida sebilik di menua.

Video muzik nya ditengkebang siku penengkebang filem bepalan di Sabah, Candy Yik nya ditambah enggau video mandangka jalai enggau sungai di sepanjai sungai Ulu Baram ba menua ulu Sarawak.

Alena mega madahka sida sebuat napi pemar lebuh rekoding lagu tu maya pandemik ngujungka pengawa nya lubah tembu tang sida berasai gaga laban lagu nya udah dikeluar nengah Youtube.

Nambahka nya ku Alena, lagu Meno’ ke baru dikeluar kena 29 Januari tu tadi nya single kedua dipasuk dalam album baru iya.

LANDIK… Alena ngembuan mayuh pengelandik baka belagu enggau nebah sape sereta ngangkatka pesaka menua Sarawak. Gambar ari Instagram Alena Murang.

PROJEK RTOH

Berebak enggau nya, album baru nya mega disukung Dayak Cultural Foundation (DCF) enggau Opis Menteri Komunikasyen enggau Multimedia Malaysia nyadi sebagi ari Projek Roads To Our Heritage (RTOH).

Ba lansa bukai, entara lagu ti kala disadaka Alena iya nya Liling, Pemung Jae, Re Lekuah, Midang Midang, Gitu’an sereta lagu bukai.

“Lebuh menua Sarawak makin mansang, bansa Dayak kemaya hari majak angkat nengah projek baka produksyen muzik ari Alena Murang tu,” ku Sekretari Kaunsil Pemegai Amanah DCF, Libat Langub.

“Kami chukup temegah ati meda pengeransing Alena enggau bala iya keran ngangkatka main asal Kenyah enggau Kelabit nengah muzik enggau jaku asal sida.

“Kami ngarapka rebak biak ulih nunda ke manah dikereja sida Alena tu.

“Pia mega, kami ngarapka bala nembiak ulih belajar sereta bekunsika penemu enggau penyelai main asal sereta jaku asal ditu,” terang Libat.

Ke penerang semua, Projek RTOH nya projek muzik kerejasama enggau tiga raban muzik Malaysia iya nya Alena Murang, Estranged enggau Stonebay.

Berindik ari nya, dalam Projek RTOH nya, tiga raban muzik tu deka ngeluarka album enggau enam tusun dokumetari ti mandangka muzik asal Malaysia Timur.

Projek tu mega disukung Opis Menteri Komunikasyen enggau Multimedia Malaysia (KKMM) lalu dipelanja nengah Dana Kandungan Digital 2020 (DKD) ungkup industri kreatif.

Nengah dokumentari tu, tiga raban muzik nya begulai enggau pemansik muzik, Dr Nadia Widyawati Madzhi ari Fakulti Muzik di UiTM deka nusui cherita peranak asal Sabah enggau Sarawak kelebih agi bekaul kereban main asal.

Sida mega ngarapka rebak biak ngembuan minat ngangkatka muzik asal ba Malaysia Timur tu ukai semina ba menua tu tang datai ba tikas entarabansa.

Mensia mayuh tau meda lagu baru Alena Murang ba Youtube iya nya https://www.youtube.com/c/AlenaMurang .

Kelimpah ari nya, barang sapa ke deka nemu berita baru ari Alena tauka pejalai dalam industri muzik di Sarawak tau ngelawa YouTube page https://www.youtube.com/c/AlenaMurang, Instagram www.instagram.com/alenamurang, Facebook www.facebook.com/alenamurang, enggau website www.alenamurang.com.

LELENGAU… Ai sungai ti chukup chiru di menua Alena empu. Gambar ari Instagram Alena Murang.