Lagu Terabai Menua ngenang jasa sida ti berambun nyawa

KUCHING: Lagu Terabai Menua endang sigi dituju ngagai sida ti gawa diluan ba selampur menua tu dikena ngenang jasa sida ti udah berambun nyawa mantu mensia mayuh ti kena rampit penyakit Covid-19, ku komposer Davney David.

Davney ti mega siku penanyi popular kala mai lagu Pengingat Ba Bandar Raya Kuching madah, lagu Terabai Menua disadaka Bolkiah Rewinna enggau Sylvia Banyie.

Ku iya, lagu nya deka nyadi sejarah ngagai semua orang laban lagu nya ngenang pasal orang ti ngelaban munsuh penyakit lalu udah ngasuh mayuh nyawa bebadi.

“Buah runding ngaga lagu tu datai lebuh maya aku sinu meda sida ti gawa ba luan bebendar ngelaban munsuh ti enda dipeda nya.

“Nya kebuah aku ngaga lagu tu ngambika ulih nyadi peransang sida lebuh gawa nyaga menua,” ku iya lebuh dirandau Suara Sarawak, apin lama.

Davney David

Ku Davney, lagu Terabai Menua tu ukai dikena iya ngambi untung, tang dikena iya nesau bala mayuh sama seati mantu sida ti gawa ba luan ngelaban penusah ti benung nuntung maya diatu.

Pia mega, iya berasai ‘terharu’ meda mayuh jaku peransang ti dibantaika mensia ba media rama pasal pemendar sida ti gawa ba luan ke bebendar gawa awakka rayat terus gerai sereta likun ari igi penyakit Covid-19 nya.

“Enda semua orang mereti ke pengawa sida, bisi nya ninga lalu bisi mega ngelaban kelebih agi Atur Tagang Pejalai (PKP).

“Nyadi, ngena asil keranjai jari aku tu, aku ngarapka sida ti ninga deka lebih agi ngenang jasa sida ti gawa ba luan awakka kita ulih mulaika pengidup baka selama,” ku iya.

Davney mega ngarapka sida ti gawa ba luan ti benung ngelaban virus nya diatu terus tan ati sereta enda putus pengarap sebaka enggau leka lagu ti digaga iya nya.

Bolkiah Rewinna

“Ngarapka lagu Terabai Menua tu terus disimpan nyadi ke kenang kitai semua belama laban Covid-19 tu meri empas ti balat ngagai dunya,” ku iya.

Lagu Terabai Menua udah dipasuk ba ‘youtube’ kenyau 3 April nyin kemari lalu udah bulih lebih 4,000 orang ti meda.

Lagu ti berentak keronchong nya becherita sentang jaku terima kasih rayat Malaysia enggau jaku peransang enda muda nyerah alah ngagai sida ti gawa ba luan ti berambunka nyawa mutuska pengerekai igi penyakit Covid-19.

Sylvia Banyie