KAPIT: Pengawa ngentak rumah panjai baru Rumah Kayan di Nanga Dia ukai semina nyendia rumah ke lantang agi ngagai peranak aja tang nyadi lambang ngintu pesaka budaya sereta penyerakup peranak menua pesisir.
Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat madah, perintah deka seruran ransing bejalaika pemansang ke meri pemaik ngagai rayat, kelebih agi ba kandang menua ulu.
“Rumah panjai ukai semina endur diau aja, tang mega nyadi lambang budaya, pesaka enggau penyerakup peranak ke patut dijaga ungkup rebak dudi,” ku iya.
Jefferson nyebut pekara nya ba mua mayuh rambau Pengerami Mangkung Tiang Rumah Panjai Baru Rumah Kayan di Nanga Dia, Jalai Kapit-Song, Hari Enam tu tadi.
Berebak enggau nya, Jefferson nyemetak madah ke pemansang ke dibai perintah ukai semina nyelinting pengawa nyendia infrastruktur aja, tang mega mungkur pekara pelajar, ekonomi enggau pengelantang rayat dikena ngangkatka tikas pengidup peranak dia.
Iya mega meransang peranak terus meri sukung ngagai perintah nentuka pemansang menua nya ulih ditampung.
Ba pengerami nya, iya bisi nyua pemeri penyampau RM15,000 ngagai Komiti Pemansang enggau Pengelikun Genturung Pendiau (JKKK) enggau Gerempung Indu Rumah Kayan.
Kelimpah ari nya, tetiap rumah panjai dikangau datai ngulu pengerami nya mega bela nerima pemeri RM5,000.
Iya mega udah setuju ngagihka lebih RM200,000 dikena ngaduka sambung transformer enggau bekal kuasa karan ke rumah panjai nya. – EDISI UKAS
