KUCHING: Diligit Komiti Gerija St. Peter Saratok ti diulu ke Reverend Rodriguez Unak bisi ngatur penemuai basa ngagai Sapit Premier Sarawak, Datuk Amar Douglas Uggah Embas sereta ngangau ke iya nyadi Temuai Dipebasa ngulu Pengerami Makai Lemai serimbai ngintu Genap Taun Ke-100 Gerija St. Peter Saratok.
Bela datai, Kaban Kunsil Nengeri (ADUN) Dudong, Datuk Seri Tiong King Sing, ADUN Krian, Friday Belik enggau raban komiti gerija ti bukai.
Ba aum nya, raban komiti gerija bisi meri penerang bekaul mayuh macham program sereta aktiviti ti udah diperambu sepanjai taun 2026 dikena ngintu pengerami jubli ti besejarah nya.
Lebih ari 16 aktiviti pengarap, komuniti sereta sosial udah diperambu diatur sepanjai taun tu nyadi tusun pengerami ngintu genap taun nya.
Kelimpah ari nya, raban gerija mega bisi bekunsi pejalai projek ngemanah sereta ngaga baru Gerija St. Peter Saratok ti udah nerima bantu belanja ari Unit Pekara Pengarap Bukai (UNIFOR).
Bantu nya deka meri pemaik dikena nambah perengkaguna enggau pengelantang ba rumah sembiang ngambi ulih dikena raban komuniti dia.
Penemuai basa tu mega ngayanka kaul ti rat entara institusyen pengarap, tuai raban bansa sereta peranak menua dikena negutka agi penyerakup, pengelantang sereta pemansang sosial ba Sarawak.
Pengerami Ngintu Genap Taun Ke-100 Gerija St. Peter Saratok dipelaba nyadi siti tikas sejarah ngempung komuniti ba semangat begulai sereta meri terima kasih ke jasa gerija ngagai komuniti kenyau ari ditumbuh 100 taun ti udah.
