INDUN SILONG
suarasarawak.news@gmail.com
KUCHING: Pengerami Ngelalu Pengabang Hari Raya Premier Sarawak richah lebuh nerima penatai lebih 20,000 pengabang ba Hari Raya Keterubah enggau Hari Raya Kedua.
Program diatur dua hari berunggu kena 10 enggau 11 April ba Palan Aum Borneo Kuching (BCCK) nya dipenyadi Premier Sarawak, Datuk Patinggi Tan Sri Abang Johari Tun Openg empu.
Rambau program nya diatur, Abang Johari betabi jari enggau mensia mayuh lalu nerima penatai rayat pupu raban bansa di Sarawak.
Iya mega bepeluang merindang bala pengabang enggau sekeda lagu ranchak baka Bekikis Bulu Betis, Kerimpak Kacha Luya sereta lagu raya.
Lebuh ditanya pemberita Abang Johari madahka penatai bala pengabang enda ngira bansa enggau pengarap nya sebagi ari penyerakup ti endang dikembuan Sarawak.
Ku iya, penyerakup semua bansa nya ukai semina diintu rambau Hari Raya aja tang mega lebuh bisi pengerami bukai di Sarawak.
Iya nangkan nya andal penyerakup ti dipegai Sarawak nya meruan dijaga kelebih agi lebuh diatu mayuh pekara ti nyadi sentimen penyarut bekau ari pengawa sekeda orang ti beambi ulih.
