PUTRAJAYA: Bisi 40,958 peranak beumur 18 taun enggau tuai ari nya ba timpuh 1 nyentuk 31 March tu tadi direjister automatik nyadi pengundi baru nengah Rejister Pengundi Tambah Bulan March Taun 2026 (DPT BLN3/2026).

Sekretari Komiti Besai Pengawa Bepilih (SPR), Datuk Khairul Shahril Idrus madah, DPT BLN3/2026 ti diaku kena 17 April lalu digazet kemari mega ngembuan 11,134 pengundi berejister ti betukar bagi menua bepilih sereta 965 pengundi betukar kategori pengundi tauka status.

“DPT BLN3/2026 tu disedia ngambi diperesa pengelama 30 hari, belabuh 20 April nyentuk 19 Mei 2026,” ku iya.

Khairul Shahril madah, SPR minta peranak ti beumur 18 taun enggau tuai ari nya ba timpuh 1 nyentuk 31 March 2026 sereta sebarang pengundi berejister ti minta betukar bagi menua bepilih tauka nukar kategori pengundi tauka status ngambi meresa nama sida ba DPT BLN3/2026.

Ku iya, sida tau meresa nengah portal SPR nengah link https:// www.spr.gov.my tauka https:// mysprsemak.spr.gov.my, portal rasmi opis pengawa bepilih nengeri ba link http://ppn.spr. gov.my, aplikasyen online ba link https://myspr.spr.gov.my, aplikasyen MySPR Semak tauka telefon nuju 03-8892 7218.

Khairul Shahril madah, nyema pengundi nadai dirintai ba DPT BLN3/2026, sida ulih minta enggau ngisi Pom C nengah aplikasyen online SPR tauka datai ngagai opis pengawa bepilih nengeri ti bekaul.

Ku iya, pengundi berejister ti deka mantah nama pengundi ti betukar ngagai bagi menua bepilih ulih ngisi Pom D nengah aplikasyen online SPR tauka datai ngagai opis pengawa bepilih nengeri ti bekaul.

Pom C enggau Pom D mega ulih dibatak ari portal opis pengawa bepilih nengeri ba link http://ppn.spr.gov.my lalu meseti dianjung ngagai direktor pengawa bepilih nengeri sereta mayar fi mantah maya jam gawa sepanjai timpuh meresa DPT BLN3/2026. – BERNAMA