KUCHING: Pengelama nganti lebih lima taun raban pemeli rumah di Borneo Samariang Garden badu lebuh permit diau (OP) rumah nya diberi ngagai sida, kemari.
Sebedau tu, media kala mantaika penanggul sida ti mayar rumah suwa ti tinggi, kelimpah mayar rega unit rumah tu ninting bulan ari taun 2019.
Chairman Komiti Pengatur Pemeli Rumah Teres Setingkat B23/Renggat Lima Borneo Samariang Garden (JBPF5) Mohd Zulfika Abdolkader madahka pengawa mutarka projek sakit tu sebuah pemujur besai ngagai bala pemeli.
“Tu mujur atas kerejasama ti diberi raban JBPF5, bgujungka semua pengawa diadu nitih chara ti betul, profesional enggau nitihka penerang taja pan keterubah suba penanggul tu dipeda baka ti nadai pengujung.
“Terima kasih ngagai raban JBPF5 ti sama begempung lebuh negika hak kitai nyadi rayat di Bumi Kenyalang tanah ti pemadu dikesayau kami,” ku iya.
Mohd Zulfika bejaku munyi nya lebuh ditanya pemberita pengudah sida nerima OP rumah di Auditorium Dewan Bandaraya Kuching Utara (DBKU) ditu tadi.
Iya mega meri terima kasih ngagai Perintah Sarawak sereta Premier Sarawak Datuk Patinggi Tan Sri Abang Johari Tun Openg ti meri komitmen mantu ngemujur projek nya.
