KUCHING: Opis Kampung Sarawak (JHS) nyain lima Sempekat Pemereti Ati (MoU) enggau Sempekat Semaya (MoA) begulai enggau bakih strategik dikena nanggam kerejasama ba atur kampung, pansik, ngintu biodiversiti sereta pemansang sektor kampung chara meruan.

Pengawa nyain dokumen nya dikemata Premier Sarawak, Datuk Patinggi Tan Sri Abang Johari Tun Openg serimbai Pengerami Bejadi Konferens Kampung Malaysia Ke-21, 2026 ditu, malam kemari.

MoU keterubah disain entara JHS enggau Opis Kampung Sabah dikena negut kaul kerejasama ba pemansang mutar penusah kampung angus.

Dokumen nya disain Tuai Konservator Kampung Sabah, Datuk Zulkifli Suara.

MoU kedua ngaul JHS enggau Universiti Malaysia Sarawak (UNIMAS) ngemaru kerejasama pansik spesies kayu kering dikena ngemanah Standard Langkar Tengkebang Kayu Ramu Malaysia lalu UNIMAS diari ke Mandal Canselor, Prof. Dr. Ahmad Hata Rasit.

Ba MoU ketiga, JHS nanggam kerejasama enggau CRAUN Research Sdn. Bhd. ba pansik kultur tisu spesies pun kayu sereta pemansang ladang kampung industri.

Kompeni nya diari ke Pemangku Tuai Pegawai Eksekutif, Dr. Bala Jamel.

Nangkan nya, MoU keempat disain begulai enggau Tulen International Sdn. Bhd. ungkup pemnasnag taba kampung dikena nanam paung kayu bekualiti.

Kompeni nya diari ke Direktor enggau Tuai Kampung, Zakaria Hamzah sereta Direktor , Farid Wahid.

Berebak enggau nya, JHS mega nyain MoA begulai enggau Sarawak Energy Berhad nengah anak kompeni, SEB Power Sdn. Bhd. Dikena bejalaika komponen flora nengah program Wildlife Monitoring and Rescue (WiMoR) ungkup Projek Hidroelekterik Baleh. SEB Power Sdn. Bhd. diari ke Pegawai Eksekutif, Ir. Bunyak Lunyong.

Nya alai, pengawa nyain lima dokumen kerejasama strategik nya mandangka pengeran JHS begulai enggau bakih industri, institusyen pansik enggau ejensi bekaul nengah pengawa ngintu biodiversiti, pansik saintifik, mutar penusah kampung angus sereta pemansang sektor kampung ke pemeruan pemansut kampung Sarawak. – EDISI UKAS