SARATOK: Lima projek nyeleti Jalai Penyambung Genturung Pendiau (JPD) ungkup sitak Awik enggau Kabo Ili ditu udah dikemendarka Opis Menteri Pemansang Menua Pesisir (KPLB).
Sapit Menteri Pengeluar Kuasa enggau Pengeraja Asal, Datuk Ali Biju madahka semua projek nya deka dipejalai enggau lengkas pengudah tembu ditinda.
Ku iya, pengawa ninda projek nya deka dipejalai enda lama agi ke alai Opis Pelilih Saratok udah dipadu nyadi ejensi bejalaika projek nya ila.
“Aku bisi amat pengandal projek tu ila meri mayuh penguntung ngagai peranak Saratok empu kelebih agi sida ke diau mendam enggau bekereja ba Awik enggau Kabo Ili ditu.
“Ngena peluang tu mega aku meri terima kasih enggau tabi puji ngagai Opis Pelilih Saratok ti udah dilempaika pengandal bejalaika projek tu bepelasarka penau enggau penyikar sida,” ku iya lebuh dirandau Suara Sarawak tadi.
Ali ke mega Kaban Parlimen Saratok madah, lima projek nya mungkur Projek Nyeleti JPD tama ke Sekula Primari (SK) Wong Besi, Projek Nyeleti JPD Rumah Ngerubong, Engkala Awik enggau Projek Nyeleti JPD Rumah Majang Ukir, Awik.
Udah nya Projek Nyeleti JPD Rumah Balang, Sungai Sawa, Awik sereta Projek Nyeleti JPD ngelawa Rumah Saka, Rumah Achai enggau Rumah Beti, di Ulu Awik.
