Lima serikat diukum ngelanggar Atur Gaji Minimum

KUCHING: Dalam bulan November bisi lima buah serikat diukum nengah Seksyen 43 Akta Kaunsil Perunding Gaji Menua 2011 laban enda mayar gaji nitih Atur Gaji Minimum ungkup pekereja sida.

Direktor Opis Pengereja Pengawa Sarawak Awang Raduan Awang Omar madahka lima buah serikat tu diukum ba Kort Majistret ti bebida.

“Dua buah serikat diukum ba Kort Majistret Sibu ke alai sebuah serikat diukum mayar RM3,800 tauka sebulan jil lalu sebuah agi diukum mayar RM2,000 tauka empat bulan jil.

“Prosiding ti dipejalai Kort Majistret Kuching mega ngukum sebuah serikat penyampau RM9,000 sereta mayar gaji pekereja ke bedau dibayar penyampau RM5,413.92,” ku iya.

Awang Raduan bejaku munyi nya dalam siti penerang media ditu, sehari tu.

Tandu iya, ba kes bukai di Kort Majistret Bintulu akim ngukum sebuah serikat penyampau RM10,000 laban ngelanggar Atur Gaji Minimum sereta mayar gaji pekereja ti bedau dibayar penyampau RM6,780.90 ngagai semilan iku pekereja.

Berebak enggau nya, ba Kort Majistret Kuching kena 19 November siku pengaji diukum RM5,000 tauka jil lima bulan laban ngelanggar atur perintah Direktor Opis Pengereja Pengawa Sarawak ba baruh Seksyen 130C (a) laban enda nitihka Perintah Pom C Kort Buruh iya nya mayar laluh gaji ti dituntut pekereja.

Iya nyemetak madah dawa tu dipejalai ngambika nyadi lalau ngagai bala pengaji ba sektor bukai sereta anang ngelanggar Atur Gaji Minimum enggau undang-undang di Sarawak.