BINTULU: Perintah Sarawak nengah Kaunsil Ekonomi Digital Sarawak (SDEC) deka nirika lima tiang pemanchar SMART ti baru ba sitak Jepak.
Pekara nya dikena nyendia servis telekomunikasyen ngagai peranak ba genturung pendiau enggau rumah panjai ba sitak nya.
Naka diatu, sebuah tiang pemanchar SMART Sungai Silas benung beoperasyen lalu sebuah agi ba Sungai Segan dipelaba deka berengkah beoperasyen ba minggu tu.
Pia mega, tiga tiang pemanchar ti bukai dipelaba deka berengkah beoperasyen ba pun taun baru.
Nya alai, Menteri Utiliti enggau Telekomunikasyen Sarawak, Datuk Seri Julaihi Narawi bepeluang nemuai gawa ngagai Palan Ekonomi Digital (PEDi) Kampung Jepak ditu, kemari.
“Rentayan Broadband Menua Pesisir Sarawak (MySRBN) Jepak bisi nyendia sambung tu ngagai 92 premis ngambi komuniti lokal ulih ngasaika bungkur internet.
“Servis tu udah tentu deka nyungkak pemansang ekonomi komuniti lokal dia,” ku iya.
PEDi Kampung Jepak ti berengkah beoperasyen ba bulan Mei 2015 nya ngerikod penyampau 12,614 penguna lalu bisi 1,085 kaban ti bisi ngerejister diri.
Palan nya mega bela ngembing 64 orang dagang ti chakah nyual produk enggau servis sida nengah tali arus.
