Limbang deka berubah enda lama agi

“Pia mega, kandang menua tu kaya enggau pengeraja asal tu deka nyungkak ekonomi Sarawak.”

LIMBANG: Rampa menua ba kandang menua Limbang deka berubah enda lama agi.

Kepala Menteri Sarawak Datuk Dr Abang Johari Tun Abang Openg madahka mayuh projek benung enggau deka dipejalai ba Limbang kelimpah deka ngubah rampa menua ba sitak nya.

“Aku beratika sitak utara kelebih agi ba sitak Limbang ngembuan peluang besai dikemansang.

“Pia mega, kandang menua tu kaya enggau pengeraja asal tu deka nyungkak ekonomi Sarawak.

NEMUAI SERAYA GAWA…Kepala Menteri Datuk Patinggi Abang Johari Tun Openg datai ba Padang Bilun Limbang ungkup pengawa nemuai seraya gawa di Limbang.

Iya mansutka jaku nya rambau Pengawa Merarau Begulai enggau Kepala Menteri Sarawak Datuk Dr Abang Johari Tun Abang Openg di sebuah hotel tebilang, ditu tadi.

Sama datai Sapit Kepala Menteri ti nyadi Menteri Pemansang Mengeri enggau Pengeraja Asal Awang Tengah Ali Hasan, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Pemangku Sekretari Perintah Sarawak Datuk Jaul Samion, Menteri Muda Betanam betupi Dr Abdul Rahman Ismail, Kaban Parlimen Limbang Hasbi Habibollah enggau Adun Batu Danau Paulus Palu Gumbang.

Nambahka nya, penemuai Abang Johari ngagai Limbang laban deka meda pejalai projek ti udah dikemendar.

“Aku deka meda projek ba Limbang dipejalai enggau manah sereta ulih tembu nitihka timpuh ti ditetap tauka enda,” ku iya.

Iya mega madahka Limbang dipelaba digaga tebing sungai pemadu panjai di Sarawak iya nya 1.4 kilometer.

Nangkanka nya, Projek Pan Borneo Wilayah Utara mega deka digaga ngena agih belanja nengeri pengudah iya berandauka pekara tu apin lama ke udah enggau Sultan Brunei Darussalam.

“Jalai sepanjang 12 kilometer tu deka ditampung ngena agih belanja ari Perintah Sarawak.

“Dikearap jalai alun tu deka neguhka agi kaul entara Sarawak enggau Brunei kelimpah nyungkak ekonomi ari sukut pengawa betanam betupi, nupi kerebau enggau ke bukai.

NGABAS SUNGAI… Kepala Menteri Datuk Pating Abang Johari Tun Openg disempulang bala bukai ngabas tebing Sungai Limbang ti benung digaga.