Long Tengoa udah jauh berubah – Henry Sum

LAWAS: Mayuh pemansang udah digaga ba sitak Long Tengoa, ditu, ku Kaban Parlimen Lawas, Datuk Henry Sum Agong.

Iya madah, mayuh ubah udah digaga ngujungka sitak tu jauh berubah enti dibanding dulu suba kelebih agi perengkaguna baka bekal elekterik, jalai, enggau ai.

Pia mega pemansang ti udah digaga enggau deka digaga tu bepun ari inisiatif Perintah Nengeri Sarawak.

“Enda lama agi, perintah nengeri deka mai projek bekal ai enggau penyambung jalai besai nyentuk ngagai Long Ibau.

“Pia mega, pengawa ngaga balai guna mensia mayuh renggat kedua ba Kampung Long Tengoa mega deka digaga enda lama agi,” ku Henry.

PENGAWA MANAH… Henry Sum (kiba) nguluka Dr Abdul Rahman ngabas kandang chapi ba Kampung Long Tengoa.

Iya mansutka jaku nya lebuh nemuai seraya gawa ba Kampung Long Tongua, kemari.

Henry Sum madah, arus penyambung telefon benung dipejalaika lalu tiang nya udah mupuk didiri.

“Selampur Sabah enggau Sarawak aja deka digaga 1,000 iti agi tiang arus penyambung seraya piak Perintah Nengeri agi berunding enggau piak serikat peribit baka Maxis enggau Celcom ungkup tiang ti udah tembu tang bedau nerima arus penyambung,” ku Henry.

Nangkanka nya, iya ngelalau komuniti Lawas ngambi besedia napi penanggul ekonomi menua baka ke diatu.

“Kita patut ngiga mayuh agi pemansut bukai lalu anang ngarapka siti pemansut aja dikena nambahka penatai pemisi.

“Baka ke diatu kitai ngemeratka sektor betanam betupi lalu kitai patut ngena peluang tu nanam lebih ari siti bansa sayur,” ku Henry nambah.

Ku iya, numbuhka koperasi mega entara sekeda chara ti ulih ngemansangka komuniti menua pesisir.

“Baka ba mengeri, tanah ulih dikemansang laban tanah din bansa tanah zon dipegulai ti ulih dikena ngaga rumah, kedai, enggau pekara bukai.

“Tang, tanah ba menua pesisir mayuh ari tanah adat enggau nadai geran lalu enda ulih dipasuk bala ejensi berumah.

Sama bisi datai, Menteri Muda Betanam Betupi, Dr Abdul Rahman Ismail, Pemesai Pelilih Lawas, Ladin Atok, Ketuai Pemantu Direktor Pengawa Berikan Darat, Awang Alim enggau ke bukai.

Suara Sarawak