Lutin ngena pengelandik ngurut nupi diri sebilik

KUCHING: Penanggul ke nuntung tudah diri ketegal enda meda tauka buta enda ngelemika semengat Lutin Dungau, 40 taun ngemansangka diri sebaka enggau orang bukai ti menyana pendiau.

Peranak asal ari Song, Kapit tu ransing gawa ngatika diri nyadi tukang urut ba sebengkah premis di Kedai Besai Emart, Batu Kawa ditu.

Nusi cherita diri ngagai Suara Sarawak, Lutin madah ukai buta ari ada.

“Maya agi mit suba maya umur aku baru nemu deka bejalai, dia aku kena kena tabin ke chukup balat lalu ngujungka mata aku enda ulih meda.

“Maya aku tabin, apai enggau indai nganjung aku ngagai sepital Kapit tang lutur madah sida udah laun nganjung aku berubat,” ku iya.

BAGAS GAWA…Lutin Dungau.

Lutin madah tu beduduk ari jalai ari menua ngagai Sepital Kapit ti kelalu jauh ngambi semilan jam pejalai.

“Udah besai aku dianjung besekula ba Sekula Ong Tiang Swee (belajar ngena sistem Braille) ungkup orang buta lalu mujur ngapuska pelajar sampai Sijil Pelajaran Malaysia (SPM).

“Udah nya, aku lalu ngambi Kus Komputer enggau Tukang Urut di Pulau Pinang urung setaun sebedau diambi gawa.

Entara palan kala endur aku gawa iya nya ba Pulau Pinang enggau Sibu sebedau mindah gawa ke Kuching ditu ba taun 2016,ku iya.

Taja bisi nerima bantu ari Opis Pengintu Pengelantang Mensia Mayuh (JKM) RM400 sebulan tang laban ke sigi bagas gawa Lutin madah enda tentu bepanggai ba bantu nya lalu ngiga belanja tambah nyadi tukang urut.

NYAMAI ISI…Siku temuai nganjung diri beurut bau ba Fringgo Blind Health Care.

“Taja OKU aku mega bisi ati deka bebini enggau beranak baka orang bukai ngambika bisi ngintu sereta nyaga aku jemah.

“Nya kebuah aku ngiga belanja lebih kelimpah ari bantu perintah nitihka penau ti dikemisi aku maya belajar suba,” ku Lutin ti madah kediri udah bebini sereta bisi siku anak indu enggau dua iku anak lelaki.

Penatai pemisi ke diulih iya enda tentu laban bepanggai ba komisyen mensia mayuh ti datai beurut kia lalu lebuh ditanya baka ni iya nurun gawa Lutin jampat nyaut iya nemu ngena Grab.

“Kekadang aku bulih manggai RM800 sebulan, kekadang kurang ari nya bepanggai ngagai orang ti datai beurut kitu.

“Belanja nya bisi dikena aku nupi bini enggau anak sereta mayar sua rumah kami sebilik.

“Nurun gawa kitu enda tusah laban aku nemu ngena Grab tang enti hari ujan bini aku nganjung nurun gawa,” ku iya.

Kala ngasai diri putus pengarap laban ekonomi ti enda tentu dia Lutin madah nya sebagi ari jalai pengidup iya.

“Taja pia, pekara nya enda ngasuh aku lemi laban aku deka bekereja bebendar lalu keluar ari penanggul ti ditapi.

“Lebuh agi mit suba aku ngasai diri baruh ari orang laban bisi penimpang tang diatu aku udah kuat laban ulih gawa sereta ulih nupi bini enggau anak sebaka orang bukai,” ku iya.

Fringgo Blind Health Care sebuah palan urut ti meri pengawa ngagai tujuh iku agi OKU baka Lutin ti diau semak Batu Kawa ditu sereta nyendiaka servis ngurut kaki, bau enggau tubuh.