NYUAL entukar enggau pemerindang iya nya dua dunya ti bebida sereta nadai besangkut paut enggau pangan diri.

Tang ketegal pengerindu besai, Lydia Aida B tauka pengempu nama Lydia Aida anak Balau mujur ngempung dua dunya nya nyadi siti.

Artis baru ti bepenau nya gawa nyadi siku penyual entukar ba siti serikat Toyota ti bepalan di mengeri Miri.

Diberi penau belagu, pintar nyual entukar enggau bajik baka Kumang udah tentu nya siti pengelebih tauka ‘bonus’ ba iya.

Seraya bekenang pasal pengawa iya nyual entukar, ba bulan Julai tu, sida Toyota bisi ngaga promosyen besai nyentuk RM12,400.

Nya alai, mensia mayuh ti bisi ati deka meli kerita bansa Toyota, kita diperansang betelefon terus ngagai iya ba lumur 019-4674807 dikena ngamatka juluk kita nya.

Kita mega ulih nitih (follow) akaun media sosial iya baka Facebook Lydia Aida B. (Amoi Toyota) tauka TikTok Amoi Toyota (Lydia Aida B) enti deka nemu silik pasal penerang pemadu baru ari Toyota.

SINGKANG BERANI
Enggai semina nengali penau belagu nya kediri aja, dia Lydia Aida B ngaga singkang berani nguji nyerungkai dunya pemerindang Dayak.

Nya siti pemutus ti pintar ngambi penau nya ulih dikemansang, dikerembai sereta dikunsika iya enggau mensia mayuh.

Juluk besai nya udah tentu nerima timbal manah ari raban pengemeran industri muzik Dayak kelebih agi Kaban Music Production (KMP) Sdn Bhd.

Serikat pengeluar lagu tebilang nya endang nyukung sapa-sapa aja ti ngembuan penau belagu dikena ngerichahka agi industri muzik lokal.

Berebak enggau nya, empai lama, Lydia Aida B mujur ngerikod enggau ngeluarka lagu single keterubah iya ti pejuluk Anak Tuai Rumah ba baruh perabung serikat nya.

Nya mih singkang keterubah iya ba dunya pemerindang Dayak sebedau ngeluarka lagu pemadu baru iya ti pejuluk Nyabak Bedarah dikena ngentapka penuduk diri.

Urung sebulan udah dikeluarka nengah chanel YouTube serikat nya, lagu Anak Tuai Rumah nya mujur dipeda mensia mayuh ba penyuah lebih 35,000 kali.

Lagu berentak ranchak nya mega ulih didinga ke kita ba Apple Music, iTunes, Joox, Spotify, Deezr, KKBOX, YouTube Music, Amazon Music, FB Music enggau TikTok.

NGUJI NGUNTIK
Penanyi beumur 30 taun nya ukai semina pintar nyual entukar enggau landik belagu aja tang bisi penau nengkebang leka lagu.

Bukti iya, lagu Anak Tuai Rumah nya siti ari lagu ti ditengkebang lalu disadaka iya empu.

Kisah dalam lagu nya ngenang siku bujang sigat ti tekait ati meda pemajik siku dara ba siti rumah panjai lalu nguji nguntik iya.

Nambah ke nya, Lydia Aida B madah, bujang nya enda nemu status dara bajik nya ti bendar iya nya anak tuai rumah ba rumah panjai nya.

Ku iya, laban ti udah mabuk ipuh pengerindu ngagai dara nya, dia bujang nya ngiga bemacham chara dikena nguntik enggau ngerebut ati dara nya.

“Pengudah meda pengeran enggau pengeransing bujang nya nguntik iya, dia dih pintu ati anak dara aya tuai rumah nya pen berengkah tebuka mimit belubah-lubah.

“Nya ngelai bisi seling enggau sechebik pengandal ngagai bujang nya, pengerindu iya enda betempap sepiak jari aja.

“Lebuh meda pintu ati dara nya majak tebuka nerima penatai iya, bujang nya mai singkang berani nguji tama belubah-lubah diau dalam meligai ati dara nya.

“Penatai bujang nya mai pengangat api pengerindu ti penuh enggau pengelantang sereta pengaga ti besai reti.

“Ngasuh ati iya semampai bebungai belama, meri semangat baru ninting hari lalu tuchum enggau ketawa semampai ngias mua iya.

“Woww…chukup manah! Dunya tu enda nyalah baka ti penuh pengerindu. Berasai amai dunya tu diempu seduai aja. Seduai lemas dalam tasik pengerindu!” ku terang Lydia Aida B.

Lebuh nusui kisah pengerindu entara bujang enggau dara nya, mua iya enda ngetu rerinyik lalu tuchum enggau tawa tepanchar ba mulut iya.

Pengudah seduai chukup andal enggau pengasai ati pangan diri, dara manis nya minta bujang nya nanya iya ngena adat kitai bansa.

BESAI RETI
Dara penakan Iban-Kenyah (apai Iban, indai Kenyah) nya madah ke diri chukup temegah lebuh nyadaka lagu Anak Tuai Rumah nya.

Kebuah pia, ku iya, laban lagu nya ngenang kisah pengerindu dua iku sulu ti chukup romantik lalu rumah panjai enggau aya tuai rumah ti disebut iya dalam lagu nya endang rumah panjai enggau aya iya empu.

Nampung nya, iya madah, rumah panjai sida ngembuan penyelai kediri empu laban bilik tuai rumah sida dua kali lipat besai agi ari bilik orang bukai di rumah panjai nya tauka buka dua pintu.

“Jarang amat pekara baka tu nyadi ba rumah panjai bukai lalu tu mih ti ngasuh rumah panjai kami chukup bebida enggau nyelai.

“Pekara tu mih dipadah ke ba siti genteran lagu aku tu ti nyebut pasal ‘anak tuai buka dua pintu’,” ku iya.

Lydia Aida B melaba tentu mayuh orang enda mereti ke genteran lagu nya.

SUKUNG TEGUT
Pejalai Lydia Aida B ba dunya pemerindang Dayak tu agi baru bendar iya nya ba pun taun tu.

Taja pen agi baru tang iya mujur ngeluarka dua iti lagu single iya nya Anak Tuai Rumah enggau Nyabak Bedarah ti dikeluarka ba YouTube kena 19 June tu tadi.

Lagu Nyabak Bedarah mega ditengkebang iya empu bepelasarka kisah pengerindu siku orang ti dikelala iya.

Kisah pengerindu nya chukup negu tangkai ati laban ngenang orang ti putus pengerindu enggau anchur ati ditinggalka orang dikesayau.

Iya madah ke diri enda sedar ke diri empu bisi penau besai ba pengawa belagu nyentuk bala bakih enggau sida sebilik suah ngaku semua nya.

“Ngelama tu, baka orang bukai mega, aku belagu semina rindu ati aja lalu aku ngasai ke petah nyawa aku semina jelan aja.

“Enda ibuh disebut deka nyadi penanyi baka diatu, sigi enda kala mansa runding aku.

“Lebuh aku belagu, suah bala bakih enggau kami sebilik ngaku petah nyawa aku chukup manah enggau nyelai didinga.

“Sida madah ke aku bisi penau ba pengawa belagu lalu nya patut dikemansang enggau dikunsi ngagai orang bukai.

“Berindik ari peransang enggau sukung sida, dia aku nguji mai singkang berani nyaut kangau ngerikod enggau ngeluarka lagu diri empu.

“Aku berengkah bekerejasama enggau raban KMP Sdn Bhd dikena ngamatka juluk nya lalu proses nya enda muntang.

“Semua pekara bekaul pengawa nya nengah telefon lalu ba maya sebaka, aku agi kakang ati enggau pemutus tu.

“Berapa bulan udah nya, nya baru aku meri pemutus setuju nerus juluk diri ngerikod lagu ba serikat rikoding nya.

“Aku gawa di Miri lalu studio rikoding tu bepalan di Kuching, nya enda muntang ba aku laban patut magi awak diri ungkup pekara nya,” terang iya.

Ba pengawa merindang nya, ku Lydia Aida B, orang ti nyadi inspirasyen iya sigi iya empu laban iya deka nyadi versyen pemadu manah ungkup diri empu.

Nampung nya, iya madah, sebedau begelar artis, iya nadai kala masuk pekit belagu laban ngelama tu iya belagu ketegal rindu ati aja lalu enda kala masang juluk nyadi siku artis.

Taja pen kiruh enggau pangku pengawa diri nyual entukar tang dara bajik burak lis nya pintar magi awak diri bejalaika pengawa nyadi pemerindang sereta begulai enggau diri sebilik.

JULUK DUDI HARI
Lebuh dirandau pasal juluk dudi hari, Lydia Aida B ngarap kediri ulih ngeluarka mayuh agi lagu bemacham rentak lalu dikerindu ke bala peninga.

Pia mega, iya ngarap dunya pemerindang Dayak terus nempa mayuh agi artis bepenau ngambi legasi sida ulih ditampung rebak dudi.

“Aku ngarapka pejalai aku ba dunya pemerindang tu lanchar, enda tumbang napi penguji enggau ulih ngetanka motivasyen diri empu.

“Tu ukai pasal optismisma aja tang tu pasal ngelempai pengandal besai ngagai tikas pengulih diri empu enggau beretan lama ba industri,” ku iya.

Lydia Aida B mega madah, industri muzik Dayak kemaya hari majak maju nitih ke pemansang teknologi digital.

“Diatu bemacham pelasar digital dikena ngelaku enggau ngeluarka lagu baka YouTube, Spotify, Apple Music enggau ti bukai.

“Tu siti pengerembai positif ti ngubah chara bala peninga mendingka lagu kelimpah muka peluang ti besai agi ngagai pemekuh industri tu ngasilka lagu bekualiti enggau ngerembai rentayan peninga nengah tali arus,” ku Lydia Aida B.

Sebedau ngujungka randau, Lydia Aida B meri terima kasih ngagai semua orang ti nyukung enggau besampika pejalai iya ba dunya pemerindang kelebih agi ngagai bala peninga, sida sebilik, bakih, bakih sama industri enggau kaban belayan.

“Terima kasih udah ngelempai pengandal ngagai aku sereta nyukung lagu enggau pejalai aku ba pengawa merindang.

“Aku chukup betuah bisi kita ti semampai bisi meri sukung tegut ngagai aku laban enti nadai kita, sapa mih aku?

“Nya alai, aku ngarapka kita terus meri sukung tegut enggau besampika pejalai aku ba pengawa tu.

“Aku besampi minta Tuhan merekat ke semua kitai ngambi mujur ba semua pengawa dipasuk kitai. Terima kasih,” ku iya netak randau.