KUCHING: Randau pasal Sempekat Malaysia 1963 (MA63) majak dipejalai taja pen isu entara Petroliam Nasional Berhad (PETRONAS) enggau Petroleum Sarawak Berhad (PETROS) bekaul hak ba pengeraja asal gas di nengeri tu apin diputar.
Sapit Menteri Besai, Datuk Seri Fadillah Yusof madah, isu ngaul PETROS enggau PETRONAS nya pekara ti nyemetak sereta enda ngeruga randau pasal pekara bukai dalam MA63.
“Nadai… pekara bukai (MA63) benung bejalai mega. Baka ke udah dipadah aku, PETROS enggau PETRONAS siti pekara.
Tang mayuh pekara bukai ti diperunding kami lalu mayuh pekara ti udah diputar kami,” ku iya.
Fadillah bejaku munyi nya lebuh ditanya pemberita pengudah bejadika Minggu Mutarka Isu Alternatif Borneo (Minggu ADR Borneo) 2025 ditu, tadi.
