Madu kelulut sempama ‘Sakang Seribu Guna’

TANJUNG MANIS: Pemedis ngenatka sakit jugal dalam taun 2014 suba nyadi pun Mona Liza Lidom, 38 taun, ngelala madu kelulut pemadu ngasi dikena ngeraika sakit pedis perut nya.

“Ari nya mih aku tekuing ati deka nupi kelulut laban ngasi agi ari bansa madu bukai kelimpah nerima sukung apai tuai aku empu ti bela rindu pengawa betupi,” ku Mona.

Menua asal sida ba Tusok, Sebayang di Tanjung Manis tang diatu udah mindah ngagai Semalau Baru, Tanjung Manis, ngulihka pengidup ba menua baru.

“Kebun kelulut ba Semalau, Tanjung Manis urung seikar pemesai lalu bisi 70 log tauka sarah.

“Nyamai madahka diri endang nerima peransang ari apai tuai kelimpah ari sukung diri sebilik enggau bala pengguna,” ku Mona.

Iya kala ngulu kus pemun nupi kelulut ti diatur ba Daro, Mukah enggau Saai nyengkaum Kus Nupi Kelulut diatur ba Balai KEMAS Pelilih Daro 2015.

PEMANSUT REJEKI: Kebun nupi kelulut urung seikar pemesai ba Semalau, Tanjung Manis.

Mona mega nyikap penemu diri nengah Seminar enggau Kus Teknologi Nupi Indu Kelulut diatur di baruh Program Agropreneur Muda Palan Pansik enggau Pemansang Betanam Betupi Malaysia (MARDI) enggau MYIQRA Solution Sdn Bhd dalam taun 2017 bepalan ba Balai Raya Kampung Saai, Daro.

Nangkan nya ku Mona, iya mega kala nguji enggau orang bedagang rambau Pesta Nanas enggau Buah ba Sarikei dalam taun 2018.

“Mujur amat dagang lebuh nya. Mayuh amat peminta madu kelulut ari bala pengusung, bisi mega sekeda betanya chara aku nupi enggau ngulihka madu sereta ni bagi kus ti patut bisi.

“Rindu amat ati ulih bekunsika penemu tu enggau orang bukai, nyengkaum penemu ngaga sabun kelulut enggau enselup, siti ari produk digaga ari jari aku empu kelimpah ari madu kelulut chulin dijual dalam butul, 150ml (RM40), 250ml (RM50) enggau 375ml (RM70),” ku iya ngelansa.

MADU CHULIN: Mona benung kiruh nyirut madu dalam sarah indu kelulut.

Di baruh chap dagang Moon’z Enterprise ti ditumbuh dalam taun 2015, juluk Mona deka ngangkatka Madu Kelulut Chulin Akasia ngagai makit besai agi, enti ulih rembus ngagai makit entarabansa. Indu kelulut ba kebun iya endang makai madu bungai, tebal agi ari bungai akasia (mangium).

“Tu mida asai madu kelulut asil ari kebun aku enggau madu kelulut bukai. Madu kelulut tu ngundan bemacham pemanah enggau tinggi agi pemaik iya enti dibida enggau madu manyi. Kelulut tu nyimpan madu dalam sapat mit ti diselap enggau propolis.

“Kelulut tu rumpas ditupi, nadai mayuh leman baka nupi utai bukai. Enda ibuh diengkani, semina kelingi sarah mesti dikupas belama nangika dikachau pukat empelawa,” ku iya ngelansa.

Ku Mona, iya deka ngambi madu sebulan sekali. Pemaik madu kelulut tu baka anti bakteria, anti oksidan, nurunka tikas gula dalam darah, nyumanka abi telih enggau lanchar bira.

Nyentuk diatu, dagang udah ngerembai ngagai mengeri Kuching, Sarikei, Sibu enggau Miri asil ari sukung enggau pemaik produk madu kelulut nya empu, tandu Mona.

CHAP DAGANG: Moon’z Enterprise dipilih Mona dikena ngelakuka produk madu kelulut iya.

 

TEMEGAH: Mona mantaika siti ari produk madu chulin asil ari kelulut ditupi iya empu.

Suara Sarawak