KUCHING: Kaunsil Adat Istiadat Sarawak (MAIS) nyadi ejensi ti ngesan tanggungpengawa besai ngatur pekara Adat Orang Asal patut ngerembaika pangku pengawa sida.
Sapit Premier Sarawak, Datuk Amar Douglas Uggah madah, MAIS patut nabur penerang, narak pemereti ati enggau ngelati pengawa nyagu budaya, pengawa asal enggau sejarah pupu Orang Asal di Sarawak.
Ku iya, ba sukut ti besai agi kelebih agi nyendiaka bup bekaul Adat, budaya enggau pengawa asal deka meri pemaik ngagai mensia mayuh, bala tuai enggau tuai raban bansa, pengari rayat sereta rebak biak.
“MAIS tu ejensi ti dilempaika pengawa ngerembaika penerang, narak pemereti ati enggau nyagu budaya, pengawa asal enggau sejarah pupu Orang Asal di menua tu. “Udah nyadi tanggungpengawa kita ngiri enggau nambah penemu bekaul Adat, budaya enggau pengawa asal ngagai mensia mayuh, bala tuai nyengkaum pengari rayat sereta rebak biak,” ku iya.
Uggah nibar ke jaku nya lebuh nerima penemuai basa ari raban MAIS betuai ke Datu Dr Neilson Ilan Mersat di Wisma Bapa Malaysia, empai lama. Nya nyadi penemuai basa keterubah Ilan ngagai iya pengudah dipadu gawa nyadi Tuai MAIS ti baru.
Uggah madah baru, pengawa puang ba MAIS ti ngaul Seksyen Pansik Adat diisi jampat enggau bala pegawai ari Orang Asal ti bepeneleba ba bidang ti bekaul.
Berebak enggau nya, Ilan madah ke empat draf nungkap baru Adat udah dibantai ngagai Opis Luyar Besai Nengeri Sarawak (SAGC) ngambi ke ditisih.
Ku iya nerang, empat draf Adat nya ngaul Adat Iban, Adat Bidayuh, Adet Kayan enggau Adet Kenyah kelimpah ari Adet Melanau ti benung ba renggat pengawa ditisih raban SAGC.
“Tu entara inisiatif dipejalaika raban MAIS ngaga moden Adat ngambi seruran engkeman enggau nipakka pekara rama ti dinamik enggau moden kemaya hari,” terang iya.
Ilan madah baru, MAIS mega chakah ngeluarka bup bekaul Tungkap Baru Adat, Budaya, Pengawa Asal, Sejarah enggau Pesaka ti nyadi daya idup raban Orang Asal di Sarawak.
“Naka diatu, bisi 85 Pejuluk Bup udah dikeluarka MAIS ngambi dibacha enggau nyadi malin mensia mayuh,” terang iya. I
ya ngena peluang nya ngangauka Uggah bejadika Simposium Adat Iban 2026 ti deka diatur MAIS ba ujung September 2026 di Sibu.
Tuju simposium nya nyikap Raban Tuai Komuniti enggau Tuai Raban Bansa kelebih agi ba Tuai Raban Bansa Iban bekaul pengawa ngaku enggau penuduk Kuasa Adat ari baruh Ordinan enggau Undang-Undang Negeri ti benung diteritka. Sama datai, Sekretari MAIS, Elsie William enggau bala pegawai kanan MAIS ke bukai.






