KUCHING: Sarawak deka bejalaika pangku pengawa ba pelin ngemansangka menua nentu ke pemansang seikas enggau menua sepiak iya nya Kalimantan, Indonesia.

Premier Sarawak, Datuk Patinggi Tan Sri Abang Johari Tun Openg madah, sida enda neju ke Malaysia tinggal ari Indonesia kelebih agi ari sukut pemansang enggau ekonomi.

“Ba Sarawak, kitai besemekih enggau menua sepiak (Kalimantan, Indonesia), nya kebuah enti menua sepiak kitai maju, Malaysia meseti bela maju.

“Kami Sarawak betapi enggau Kalimantan, ke alai Nusantara deka ditumbuh, enda patut Malaysia enggau Sarawak semina meda aja?” ku iya.

Abang Johari mansutka jaku nya ba Konvensyen Nasional Perintah Penyerakup di Palan Dagang Dunya Putra (PWTC), Kuala Lumpur, ditu kemari.

Nambah ke nya, Abang Johari ke mega Chairman Gempung Parti Sarawak (GPS) meri terima kasih ngagai Menteri Besai, Datuk Seri Anwar Ibrahim laban ngagihka besai belanja ungkup adan menua Sarawak.

“Awak Tebedu seikas enggau Entikong, Kalimantan…anang kitai ba belakang tang Kalimantan nyau ba mua,” ku iya nyemetak.

Seraya nya, Abang Johari ngelalau Perintah Penyerakup beratika pemar ditapi Sarawak ba Beting Patinggi Ali ti dikeruga kelebih agi menua China.