Sehari tu, masuk hari ke-17 tauka renggat kedua Atur Tagang Pejalai (PKP) ti patut dititih rayat dikena napi pengerekai penyakit Covid-19 ba selampur menua Malaysia.
PKP keterubah bepun 18 nyentuk 31 March maya pangka penyakit baru ditemu nyadi di menua tu, diatu masuk renggat kedua bepun 1 April lalu dipejalai dalam timpuh 14 hari.
Siti berita manah dipansutka Ketuai Direktor Opis Pengerai Datuk Dr Noor Hisham Abdullah madah, PKP keterubah bisi mandangka pemujur mimit bepelasarka gambar graf kerekai penyakit tu ti landai.
Pekara tu beduduk ari pemujur raban Opis Pengerai Menua (KKM) ti jampat ngelala kes enggau jampat.
Nitihka bacha graf kes Covid-19 di Malaysia, garis mirah nengah pansik Palan Pansik Ekonomi Malaysia (MIER), mandangka kes Covid-19 dipelaba niki dalam timpuh PKP keterubah.
Udah nya, garis biru iya nya kes Covid-19 ti dirikod KKM. Mandangka garis biru majak landai tauka ‘flatetten the curve’, ku iya Dr Noor rambau aum pemberita kena 1 April tu tadi.
Nya alai, nyerumba gelumbang kedua PKP tu dia KKM deka bebendar agi ngatur pengawa ba sitak ‘tumpuk angat’ ti ditemu bisi Covid-19.
Ambika banding enti di Sarawak, nyema bisi siku peranak rumah panjai ditemu positif Covid-19. Dia semua peranak rumah panjai nya deka diperesa lalu diperubat ngambika penyakit tu enda ngerekai ke bukai.
Dr Noor mega bisi nyebut penyakit Covid-19 tu ulih diseliah. Asal rayat mayuh nitihka PKP sereta ngemeratka pemeresi diri baka suah bebasuka jari enggau nemu nyaga takah ari pangan diri.
Pemadu beguna, semua rayat meseti mereti nitihka atur ke udah ditetap lalu sama nyingkang berubah nitih gaya pengidup jeman digital.
Chunto ke pemadu muntang diatu, semua pekara ulih digaga ba ujung jari. Kitai semina nguna buah runding ke inovatif baka ngereja pengawa ari rumah nengah chara on-line, bebelika barang on-line enggau mayuh agi ke bukai.
Nyadi pilih pengidup (trend) ti baka tu ulih nyeliah kitai betemu enggau mayuh orang kelimpah ti ulih nyeliah penyakit tu ari terus ngerekai tauka berampit.
Ungkup rikod, naka 1 April tadi Malaysia bisi ngerikod penyampau kes 2,908 kes. Ari penyampau nya, 142 kes baru. Urung 2,218 kes benung diperubat, 645 kes gerai enggau 45 iku dirikodka mati.
Penyampau rayat Malaysia ke udah diperesa bisi 43,462 iku. Ari penyampau nya 32,894 iku mandangka pemutus negatif, 7,660 (nganti pemutus) enggau 2,908 iku positif Covis-19.
Ba Sarawak, naka 1 April penyampau sida ke bebadi nyawa ketegal Covid-19 tu iya nya bisi lapan iku, 14 iku diripotka gerai lalu udah dikemendar pansut ari sepital.
Kes baru Covid-19 di Sarawak bisi 32 iku, penyampau ditemu positif naka tu bisi 188 iku. Penyampau orang ke disadang bisi kaul enggau sida ke positif (PUI) iya nya 1,288 iku. Ari penyampau nya 66 kes (PUI) baru, 1,045 iku (PUI) ngayanka ditemu negatif lalu 55 kes (PUI) agi dipansik.
Di Sarawak mega udah dibantaika Komiti Penyangga Penusah Nenyit Nengeri (JPBN) tiga kategori zon penyakit tu iya nya zon mirah, menua ti ngerikod kes lebih ari 41 kes. Naka tu semina Kuching ba kategori mirah iya nya ngerikod 118 kes positif Covid-19.
Udah nya zon oren, menua ti ngerikod 1 ngagai 40 kes. Bisi 13 menua di Sarawak dalam kategori tu iya nya Kota Samarahan ngerikod 20 kes, Miri (11), Serian enggau Sibu (4), Betong (9), Sarikei enggau Limbang (6), Bintulu (5) ditangkan Simunjan, Sri Aman, Mukah, Matu enggau Lawas bela ngerikod siti kes.
Siti agi kategori zon gadung iya nya menua ke agi beresi ari Covid-19 naka lemai ensana bisi 28 buah pelilih menua di Sarawak.
Kitai bela besampi awakka penyakit tu jampat putus dalam timpuh PKP renggat kedua tu lalu nadai agi ngerampit ngagai palan ke agi beresi lebih agi di menua pesisir.
Nya alai, perintah nengeri naka tu agi nagang mensia mayuh ke diau ba mengeri enda ibuh pulai ke rumah panjai jam ke diatu laban nya ulih ngasuh penyakit tu ngerekai.
Taja pia, pejalai mensia mayuh entara pelilih menua sekumbang PKP renggat kedua tu semina dikemendar ungkup pengawa rasmi, bejalaika pengawa beguna (esential services), pemati diri sebilik, diri sebilik sakit raya enggau deka beperesa pengerai.
