SEBUT aja nama Phoebe Chloe, nadai siku orang enda ngelala kelebih agi ba sida ti rindu ke lagu Dayak.

Empai lama, dara manis burak lis ti tebilang enggau lagu Nuan Limpang Muai Penepan nya mujur ngeluarka lagu baru iya ti pejuluk Manah Agi Beserara.

Seminggu pengudah dikeluar, lagu berentak balada nya mujur dipeda ba penyuah lebih 45,000 kali sereta nerima timbal manah ari mensia mayuh.

BALAT NINDING
Lagu ditengkebang artis tebilang ti mega penengkebang leka lagu bepenau, Allesandro Deroma nya ngenang kaul pengerindu entara dua iku sulu ti udah enda sepenemu agi.

Ukai semina udu ninding sereta bejaku kasar aja, lelaki dalam lagu nya mega kempang datai jari ngagai sulu ati iya.

Keterubah, indu nya suah nguji ngalah kediri tang ulah lelaki nya majak nyadi, ketegal ninding iya kempang datai jari.

Pengudah suah meri peluang ngagai lelaki nya ngubah perangai diri tang iya majak enda berubah, dia indu nya mutus ati ngujungka pengerindu seduai.

Indu nya ngeleda, iya enda ulih idup enggau lelaki ti kelalu ninding, kasar jaku enggau kempang datai jari baka nya.

Nya alai, iya mutus ati milih jalai beserara ari terus idup merinsa ba siti pengerindu ti berachun nya.

BEJIMAT BESULU
Berebak enggau nya, Phoebe Chloe ngelalau mensia mayuh kelebih agi bala bujang dara ngambi seruran bejimat lebuh milih sulu.

Iya madah, anang enda bejimat lebuh besulu lalu giga mih sulu ti pintar masa, ngaku enggau lurus ati sayau ke nuan siku.

Tang, ku iya, enti sulu nuan nya udu ninding, kasar jaku nyentuk kempang datai jari, manah agi milih jalai beserara lalu anang nerus pengerindu nya enggai ke nuan nesal dudi hari.

“Enti deka besulu, giga mih sulu ti pintar masa, mereti, mentas, siru enggau lurus ti sayau ke nuan siku.

“Anang nguji beretan enggau pengerindu ti berachun. Enti lebuh besulu, iya enda masa nuan sereta kempang ngemedis ke nuan, enda ibuh disebut enti udah jadi melaki bini ila.

“Pengerindu nya pengelantang lalu ukai pemerinsa,” ku lalau anak pengkuan ari lima iku diri menyadi nya.

Lebuh nyadaka lagu nya, Phoebe Chloe ngaku enda berasai ai mata iya neritik naya laban ngerunding diri ba penuduk indu dalam lagu nya.

Sekumbang ngemujurka lagu nya, mayuh pekara baru kelebih agi pasal vokal dipelajar ke iya ari dua artis lokal tebilang, Allesandro Deroma enggau Hairee Francis.

Anak penakan Kenyah-Iban nya meri terima kasih ngagai Tuhan laban lagu nya nerima timbal ti chukup manah ari mensia mayuh lalu tebal agi sida madah ke lagu nya chukup mangka ba ati.

UDAH SELATAN
Pejalai Phoebe Chloe ba dunya pemerindang Dayak bepun ba taun 2021 pengudah nguji masuk Program Nguji Penau Bintang Radio Televisyen Malaysia (RTM).

Tang sayau umur iya maya nya bedau chukup lalu raban RTM semina ngasuh iya merindang aja enggau lagu Percayalah ari penanyi lumur satu Malaysia, Datuk Seri Siti Nurhaliza.

Pemanah sera nyawa iya lebuh nyadaka lagu nya mujur ngait ati siku komposer tebilang, Embat Lala ti nengkebang ke iya lagu Nuan Limpang Muai Penepan.

Lagu nya ngangkat ke nama Phoebe Chloe ba panggau muzik lokal nyentuk dikelala mensia mayuh.

Naka diatu, iya mujur ngeluarka 17 iti lagu nyengkaum Nuan Limpang Muai Penepan, Emperian Wai Bula Enggai, Diempu Nuan Siku enggau ti bukai.

Pengerindu ba pengawa belagu nya dikembuan iya kenyau ari sekula primari lebuh pengajar muzik iya ngerejister nama iya masuk siti pekit belagu.

Berengkah ari nya, iya masuk mayuh pekit belagu sereta suah bulih gelar champion ba pekit nya.

“Siti ari kenang manis aku begelar pemerindang iya nya lebuh diberi Kaunsil Seni Sarawak (MSS) merindang ba panggau besai Lumba Malaysia (SUKMA) Sarawak ba taun 2024,” terang Phoebe Chloe.

BERETAN LAMA
Nangkan nya, iya ngarap kediri ulih beretan lama dalam industri, ngasilka mayuh lagu bekualiti sereta enda ngetu nerima sukung ari mensia mayuh.

Iya mega ngarap industri muzik Dayak terus maju baka menua bukai sereta majak nelebaka diri enggau ubah teknologi.

Ku iya, diatu muzik kitai tau dikumbai manggai ba tikas antarabansa laban majak dikelala rayat menua luar lalu nya siti penyulut ti ngemegah.

Sebedau ngujungka randau, Phoebe Chloe meri besai terima kasih ngagai semua orang ti nyukung pejalai iya nyadi pemerindang kenyau ari suba nyentuk sehari tu.

“Aku chukup ditegu enggau sukung tegut kita ngelama tu lalu aku ngarapka kita terus nyukung pejalai aku ba dunya pemerindang tu.

“Enti nadai sukung ari kita, aku ukai sapa-sapa! Ngarap Tuhan terus merekat ke kitai semua. Aku sayau ke semua kita!” ku Phoebe Chloe nutup randau.