KUCHING: Ex-Sapit Kepala Polis Sarawak, Datuk Mancha Ata mujur dichiri mangku penuduk nyadi Kepala Polis Sarawak kemari.
Iya nyilih penuduk Datuk Mohd Azman Sapri ti mujur dichiri nyadi Direktor Opis Pansik enggau Penerit Atur Trafik Bukit Aman.
Pengawa nyiri Mancha nyadi Kepala Polis Sarawak ngemataka iya nyadi anak Sarawak keempat mangku penuduk nya.
Program Nyerah Nerima Pangku Pengawa enggau Ngelekatka Pangkat nya diatur ba Bilik Aum Pegawai, Indu Opis Polis Kontinjen (IPK) Sarawak seraya dikemataka Direktor Opis Pansik Penyalah Komersial Bukit Aman, Datuk Seri Ramli Mohammad Yoosuf.
Program nya berengkah enggau pengawa ngelekat pangkat ngagai Mancha ti dipenyadi Ramli lalu dientudi ke pengawa nyain surat nyerah terima pangku pengawa, pengawa nyuaka surat nyerah terima pangku pengawa sereta nyerahka tungkat kuasa ari Mohd Azman ngagai Mancha.
Bisi diatur, program nyerah terima pangku pengawa Sapit Kepala Polis Sarawak entara Mancha enggau Datuk Ibrahim Darus.
Program sebaka bela ngemata pengawa nyerah terima pangku pengawa penuduk Chairperson PERKEP Sarawak entara Datin Nassariah Mohd Nassir ngagai Datin Jennita William ti dikemataka Chairperson PERKEP Opis Pansik Penyalah Komersial Bukit Aman, Datin Seri Fatimah Moyedden.
Mancha madah, pengawa nyiri iya nyadi Kepala Polis Sarawak endang siti basa ti besai ba iya dikena ngembing Polis DiRaja Malaysia (PDRM) Sarawak.
Iya madahka diri mangku pangku pengawa besai sereta mar nyadi Kepala Polis Sarawak.
“Nya alai, aku ngarap bala Tuai Opis, Tuai Formasyen enggau Tuai Polis Pelilih ulih meri kerejasama enggau sukung penuh ngagai aku nerus legasi penyulut PDRM Sarawak.
“Laban nyadi Kepala Polis Sarawak ti baru, udah tentu aku bisi chuan kediri empu dikena ngembing PDRM Sarawak bepelasar ke dua pekara besai dikemerat Kepala Polis Menua.
“Tu nyengkaum servis bepelasar ke integriti enggau chara atur ti manah sereta nyukung polisi perintah nuju pengelantang komuniti,” ku iya.
