Manuk ba daya idup Iban

MANUK iya nya sebansa burung tupi ti suah agi diinang ketegal dagin enggau telu iya lalu dikumbai asal ari manuk kampung mansau tauka nama sainstifik iya Gallus gallus.

Nitihka penerang ari Wikipedia – ensiklopedia ngatika diri, manuk tu entara jelu inang ti jinak sereta pemadu mayuh idup di dunya, ngelui ari 19 bilion iku naka taun 2011.

Pansik genetik mega nunjukka mayuh macham penatai purih asal manuk baka ari Asia Selatan, Tenggara enggau Timur sereta bisi mega ditemu ba menua Amerika, Eropah, Timur Tengah enggau Afrika ti asal ari menua mit India.

Ku Pemesai Waran (B) Lenggang Nuing, manuk makai sebarang utai baka ari mayuh macham leka utai ngagai macham bansa daun sereta indu utai enggau chit.

Tang manuk tupi ku iya, suah agi diberi pemakai manuk baka sum enggau pemakai ti ngundan protein lalu manuk tupi enda ulih terebai jauh lalu nemu mulaika diri ngagai sarang.

KURUNG SEMENGAT… Manuk diguna ba mayuh bengkah daya idup iban nyengkaum dikena bebiau.

Dagin manuk nyadi pemakai ti balat dikerindu mensia di dunya tu nadai milih manuk bansa manuk baka manuk karan, manuk sabung enggau ke bukai ti dibela ngena macham chara.

“Dagin manuk ulih diguring lalu diipung pia aja tauka nyadi engkayu ti dipanduk ngena macham chara; ulih ditunu, dipanggang, dipansuh tauka dilulun.

“Dagin manuk mega nyamai panduk terejun gulai upa tauka sebarang daun babas bukai, kari ngena rempah enggau digulai macham rempah ke bukai lalu diempa begulai enggau asi,” ku iya ngelansa.

Daya Idup Iban

Ba daya idup kitai bansa Iban ku Lenggang, manuk tu sebansa jelu tupi ti ngembuan reti chukup dalam, ukai semina ditupi ke dempa aja tang bisi guna bukai.

CHUKUP INTU… Manuk sabung deka dikurung lalu ditambat ba maya hari enggau jam ti patut aja.

Enti kelia, manuk endang dilepau pia aja lalu manuk sabung tauka manuk lelaki suah agi niki pun kayu seraya manuk indu enti iya betelu dikurung dalam kerungan di ruai lalu manuk sabung ditambat ba tempuan ruai.

“Manuk tu mayuh bansa lalu manuk bangka iya nya manuk Keling ti disimpan iya dalam bangka tauka tajau.

“Manuk bangkut iya nya bansa manuk ti pandak iku sereta nyau deka baka pendiau manuk indu lalu emperian anak itit nya nama ti diberi ngagai anak manuk.

“Manuk jagau iya nya manuk China tauka manuk dibeli ari pasar lalu suah kitai ninga orang ngumbai nya manuk karan.

“Manuk lanjau dikumbai kitai manuk ti bedau tuai lalu manuk sigun iya nya manuk ke beiku panjai seraya manuk sabung tu manuk lelaki ti ditupika sabung ba kelang.

NGEMAI TUAH… Manuk sabung ti chukup intu deka meri tuah.

“Jarang amat kitai meda tauka ninga manuk dikumbai orang manuk bandung, besapit ti mechah ari sigi telu aja, lalu manuk sipat Bugau nya manuk ke sakit bebelit batang rekung,” ku Lenggang ngelansa bansa manuk.

Guna Manuk Dalam Pengarap Lama

Ba raban bansa Iban ke agi ngemeranka pengarap lama, telu manuk nya besai guna lalu diguna ba pengawa miring sereta dikena maya mayar tunggu.

Nampung jerita tuai ku Lenggang, manuk berengkah diguna ba pengawa miring iya nya maya Simpang Impang ke deka nunggu Bunsu Ribut.

“Pemulai iya ke enda nyadi nyerang Bunsu Ribut, bala sida bisi ngetu enda lama ba rantau jalai.

PENGERAK PAGI… Kukuk manuk nyadika lalau jam ngereja pengawa di rumah panjai kelia kelebih agi pagi hari.

“Lebuh ke ngetu nya manuk lalu terebai ba atas pala sida ke bukai lalu enda mukai-mukai bira ba atas pala sekeda ari sida dia kelebih agi bala sida ke tuai.

“Ketegal ke enda bebebasa baka nya dia manuk diukum nyadika kereban dikena maya Iban miring.

“Kenyau hari nya, manuk lalu dikena miau lebuh bisi pengawa,” ku Lenggang nampung.

Chura Bulu Manuk

Enti kitai berati, sida ke tuai kelia endang siru amat ngagai jelu tupi lalu gelar manuk endang mayuh bansa.

PUH NYAGA PENEMU TUAI… PW (B) Lenggang Nuing megai manuk Burik Kesa, nitihka gelar chukup mangah maya makai tengahari tauka hari panas, ngenjing baka kesa.

Ku Lenggang, nama manuk diberi belalauka chura lalu chura tu diambi belalauka nama ikan, burung, indu utai enggau bansa jelu reptilian bukai.

“Sekeda chunto nama manuk belalauka nama ikan baka adung, bangkas, banta, baung, engekerik, enseriban, jalak kepiat, mulau enggau semah.

“Lalu chunto nama manuk nunda nama burung nyengkaum empitu, engkerasak, ensulit, ensing, kunchit menaul, pipit, sempidan, sengayan enggau tajai.

“Nama manuk diambi ari nama indu utai nyengkaum empelawa, kesa, kesulai, lalat, manyi, menaning, panggang, pantak enggau semut,” lansa iya.

Nangkan nya ku iya, selangkuh tubuh manuk tu nyengkaum bulu, bulu sua, dunggul, gambir, rekung, pala, mata, sayap, lelanjang, pah, tada, taji enggau kaki.

Kelimpah ari nya keresa dalam manuk baka ati, empedu, lintan, kundut enggau perut lalu tai manuk ke nyau udah jarang dipeda kelebih agi ba mengeri iya nya tai manuk lintung.

Enti kelia, tai manuk lintung nyau ngachir sebelah kaki lima tauka ba laman rumah laban manuk tupi endang dilepau pia aja.

Bansa Manuk Sabung Iban

Nampung jerita sida ke tuai ku Lenggang, gaya pendiau manuk ti digelar Manuk Ijau Lelayang iya nya punggung iya sematung ninjau, bedada banda imbuk tukuau, bau chiru biring tasau, belakang lang chelum mansau, iku merundu kelabu papau, bulu sua ngambi sua ijau lelayang.

“Punggung Manuk Kapiat sematung tuntung kulat, dada iya banda burik lelekap enggau bau chiru asu rapat lalu belakang lang chelum bekilat, Iku merundu ijau burung bidat sereta sua ngambi anak belalat Umbang.

“Lalu Manuk Tawai tu punggung iya sematung tuntung engkerawai, dada banda pipit kechuai, bau chiru ijau enseluai, belakang lang chelum meratai enggau iku merundu jelayan tuai seraya besuaka anak engkerawai bintang.

“Gaya pendiau punggung Manuk Biring dikumbai sematung tuntung engkerunding, dada nyala banda ensing enggau bau iya chiru tasau biring. Belakang manuk biring tu lang chelum begenyeling, iku merundu jelayan menaning lalu sua iya ngambi anak menaning banjang.

“Manuk Jelayan tu dipeda ari punggung iya sematung tuntung burung danan, dada iya banda bejalak ikan enggau bau iya chiru biring sengayan. Belakang manuk tu lang chelum redam enggau iku iya merundu engkarung ridan sereta ngambi sua anak sempidan arang.

“Kepenudi iya nya Manuk Burik Belatuk ke alai Punggung iya sematung bangkut serantuku, pala patung iya besemada balu enggau dada banda pipit antu, bau iya chiru ensing batu, belakang lang chelum ngelepu enggau iku merundu kelabu empitu seraya sua iya bisi besemut panggang,” ku Lenggang ngelansa silik bansa manuk sabung kitai Iban.

Nambahka nya ku Lenggang, sekeda ari bansa manuk sabung bukai iya nya Adung, Biring, Biring Sengayan, Biring Sempidan, Biring Tasau enggau Bangkas.

Bisi mega bansa manuk dikumbai kitai Banda, Banda Ensing, Banda Pipit Antu, Banda Pipit Kapua, Banda Pipit Kechuai, Banda Daun Imbuk, Banda Imbuk Tukuau, Banda Burik Lalekap enggau Banda Bejalak Ikan sereta Bejalak.

Bansa manuk burik mega tebilang baka Burik, Burik Belatuk, Burik Menaul enggau Burik Semut Gatal kelimpah Engkarong, Engkarung Ridan, Ijau Lelayang, Ijau Enseluai, Kapiat, Kelabu, Kelabu Papau, Kelabu Empitu, Labang, Labang Kubah, Menaning enggau Menaning Banjang.

Ku iya, bansa manuk dikumbai Sematung, Sematung Jelayan Muda, Sematung Ninjau, Sematung tuntung Engkerawai, Sematung tuntung Engkerunding, Sematung tuntung Burung Danan, Jelayan, Jelayan Menaning, Kepiat, Tasau Biring, Tuntung, Tuntung Kulat enggau Tuntung Engkerawai endang bisi tuah sida empu.

Tuah Manuk Sabung Iban

Genap manuk sabung endang bisi ngembuan tuah iya empu kelimpah ari ngandalka penajam mata taji enggau penau orang ngebat taji nya.

“Penemu senentang macha tuah manuk endang dipelajar orang ke rindu nyabung ari orang ke tuai kelia lalu ditampung dataika sehari tu nyadika lalau enggau tenggau nasip sida ti nyabung.

“Ditu aku semina ngelansa enggau nerang mimit senentang tuah manuk belalau ari penerang orang ke tuai enggau orang ke nemu nyabung manuk, ti suah dikunsi lebuh berandau puang, betunga ba ruai enti bisi pulai ke menua di Ulu Mujok, Julau.

“Manuk biring bisi tisik ninchin ba sebarang endur di kaki manuk lalu betada chelum.

“Bejalak ngembuan belakang bungkuk, begelung dada lalu bebulu baka kapas ba baruh sayap.

“Lalu Menaning bebulu kaki enggau Engkechung bisi nyelit betusun tiga ari belakang kaki iya.

“Manuk kelabu betisik kelulung tujuh, beiku jai bendar gamal tauka iku ngepit baka ke siti aja seraya manuk labang betisik batu kapak tauka singkap tisik besai, iku bisi bulu burik menaul,” lansa Lenggang bekunsika anak penemu diri enggau Suara Sarawak.

Ngasika Ajar Orang Tuai

Kelimpah ari nya ku iya, kitai agi mit menya ngasi amat ke jaku ajar tauka tangkan sida ke tuai kelebih agi ba pemakai ti datai ari rengka manuk.

“Ambika chunto, mali makai kaki manuk enggaika tulis jai baka kair tauka keranjai manuk.

“Kala mega ditagang makai pala manuk enggaika suah ngantuk baka manuk enggau mali makai rekung manuk enggaika pala singit.

“Taja pia, utai disebut sida ke tuai tu engka bisi pengamat lalu bepanggai ba kitai empu sekalika pechaya tauka enda.

“Nya kebuah aku ngarapka nembiak redak enggau rebak baru tau bulih penemu baru ari lansa kenang ti dikunsi senentang pemesai reti manuk ba daya idup kitai bansa asal ti ngasika ajar sida ke tuai dulu ngetup garam.

“Anang enda ingatka bansa diri baka sempama jaku tuai manuk taja iya dipeda lama repuk, tang bisi maya iya tau engkukuk ngenjun gelanggang,” simpul Lenggang.

Suara Sarawak