MARUDI: Pasar Marudi enda lama agi deka bisi sambung rentayan jalai alun ti meruan agi udah tu lalu nyamai dilawa.

Pemisi Jematan Marudi beungkus RM75 juta mega deka nyambung Pasar Marudi ngagai Mengeri Miri, ku Kepala Menteri Datuk Patinggi (Dr) Abang Haji Johari Tun Openg lebuh ngelancharka Projek Waterfront Marudi ba Dataran Marudi, kemari.

Abang Johari madah, ari pemisi perengka guna nya, pengulih Baram enggau Marudi ba dagang temuai ti meri empas ngagai ekonomi ti diasaika peranak menua nya.

Sitak Baram ku iya bisi pengulih besai ba dagang temuai ukai semina semak Mulu, tang ngembuan pematak main asal enggau pengidup raban bansa asal Sarawak ti tulin.

“Kelimpah ari nya, perintah Sarawak mega deka bejalaika projek ngaga jalai alun ti nyambung Pasar Marudi enggau Long Terawan.

“Renggat keterubah projek nya, kitai ngagihka RM43 juta dikena ngaga sambung jalai ari Marudi nyentuk Long Terawan.

“Dalam timpuh dua taun, kitai deka nampung pengawa ba renggat kedua lalu penembu sambung jalai tu deka matak mayuh agi bala temuai kitu,” ku iya.

Ba lansa bukai, Abang Johari ngandalka pejalai projek deka meri pemaik ngagai rayat ba sitak Baram sereta juluk rayat deka ngangkatka Baram nyadi pelilih menua baru nyadi nyata jemah.

Pejalai projek nya ku iya deka meri rampa baru ngagai Pasar Marudi nengah Projek Waterfront Marudi ti udah dikemendar di baruh pegai perintah besai sebedau tu.

Entara bala bisi datai Sapit Menteri Datuk Amar Douglas Uggah Embas, Menteri Utiliti ti mega ADUN Kemena Datuk Sri Stephen Rundi Utom, Menteri Kaunsil Kandang Menua enggau Pengawa Berumah Professor Datuk Dr Sim Kian Hui, Menteri Muda Kaunsil Kandang Menua ti mega ADUN Marudi Datuk Dr Penguang Manggil, Sapit Speaker DUN ti mega ADUN Mulu Datuk Gerawat Gala, MP Baram Anyi NGAU, MP Bintulu Datuk Sri Tiong King Sing enggau ADUN Telang Usan Dennis Ngau.

Urung 4,000 iku datai meda pengawa ngelancharka Projek Waterfront Marudi ditu, pagi kemari.