Masterpiece mujur ngangkatka revolusyen muzik rock Dayak

KUCHING: Masterpiece nyadi sebengkah raban pemuzik Iban ti udah mujur ngangkatka revolusyen genre muzik rock ba industri muzik Dayak.

Presiden Gerempung Pemuzik Dayak (DAMA) Brown Sang Lagan madahka Dama temegah ati meda siti ari raban muzik Dayak baka Masterpiece ti udah lama nempa nama ba industri muzik Iban lalu deka ngumpul bala peminat sida ngulu ‘Konsert Masterpiece 1Dekad Merindang ke Bintang’ enda lama agi.

“Keterubah ayan ba dunya pemerindang Masterpiece lalu nempa nama lebuh nerima mayuh anugerah ba Anugerah Muzik Dayak (AMD 2010) sereta nyadi kelai sebuah raban muzik rock kitai Dayak maya nya.

“Ba penemu aku, siti tegal raban tu mujur laban ngembuan kualiti muzik enggau ‘production’ ti tinggi,” ku iya.

Brown bejaku munyi nya lebuh dirandau pemberita kemari.

Brown Sang Lagan

Ku iya, pemujur Masterpiece dalam dunya pemerindang seruran nerima sambut ti manah ari bala peminat lebuh nerima anugerah bukai ba AMD 2012, AMD 2014 enggau AMD 2016.

Tambah iya, DAMA besai amai pengarap ngambika artis Dayak ti bukai ngambi cunto ba pemujur raban Masterpiece tu.

“Kami ari DAMA andalka bala artis kitai Dayak sama ulih ngemeranka kualiti enggau penulin (Quality & Originality) ba pengawa nengkebang lagu tauka muzik.

“Pia mega arapka bala rebak baru ti angkunka pengawa belagu enggau muzik ulih belajar ari menua bukai baka chara ngeluarka lagu enggau chara ngelakuka lagu di menua tu ngagai tikas entarabansa.

“Sama-sama meh kitai besemekih ba dunya digital enggau teknologi sereta anang sesekali ninggalka kelai bansa kitai empu di Sarawak ditu,” ku lalau iya.

Ba randau kepenudi, dia iya arapka ‘Konsert Masterpiece 1Dekad Merindang ke Bintang’ tu mujur sereta terus bulih sukung bala mayuh enggau peminat Industri Muzik Dayak (IMD).

Suara Sarawak