SHANGHAI: Sarawak nyelinting mayuh agi pengawa meranak puku ari China ba sektor teknologi gadung, nyimpan kuasa, pemintar digaga (AI) enggau ekonomi digital. Sapit Premier Sarawak, Datuk Amar Awang Tengah Ali Hasan madah, nya dikena negapka penuduk nyadi hab kuasa gadung Malaysia.
Ku iya, kaul ekonomi SarawakChina bisi pengulih besai majak ngerembai dudi hari.
“Bidang ti bisi pengulih besai nyengkaum kuasa ulih dikena baru, teknologi bateri enggau sistem nyimpan kuasa (ESS), kelimpah ekonomi belidar baka teknologi waste-to-energy enggau kereban berumah meruan.
“Lebih 70 peratus pemansut kuasa karan Sarawak datai ari kuasa hidro beresi, disukung pengawa meranak puku nambah ba kuasa solar enggau pemansut kuasa ulih dikena baru bukai,” ku iya.
Awang Tengah nyebut jaku nya lebuh Sarawak-China Strategic Investment Roundtable di Shanghai, ensanus. Iya madah, Sarawak mega ngerandang peluang kerejasama ba automasi, AI enggau robotik ungkup sektor berumah enggau kilang, kelimpah numbuhka ekosistem palan data enggau komputer prestasyen tinggi.
Menteri Dagang Antarabansa, Industri enggau meranak puku nya madah, dagang entara Sarawak-China manggai RM26.8 bilion taun 2024, seraya Sarawak ngerikod RM116 bilion meranak puku dikemendar ungkup timpuh 2021 ngagai 2025.
“Bintulu diaku World Economic Forum dalam bulan June tu tadi nyadi entara 36 Transitioning Industrial Clusters dunya lalu siti nya aja di Asia Tenggara mega meri pengelebih ngagai Sarawak matak industri ke deka ngurangka karbon.
“Kitai deka mansang ngelui ari randau enggau mantaika pengawa diatu ngagai pengawa meranak puku tegap, mindah teknologi, bekunsi penemu ke entap sereta pemujur timpuh panjai begulai,” ku iya nyemetak.
Awang Tengah madah baru, Perintah Sarawak ukai semina ngiga pengawa meranak puku aja, tang nyendiaka peluang bekunsi ngagai pemeranak puku enggau sukung perintah sekumbang pengawa nya, ari renggat konseptualisasi nyentuk pejalai pengawa enggau operasyen. – EDISI UKAS
