Matthew, Suziana menggi gelar Mister & Miss Borneo Tribal Fest 2019

BAU: Gelar Mister enggau Miss Borneo Tribal Festival 2019 dipenggi Matthew Malong Bill enggau Suziana Damik ngalahka semilan iku pemekit kepenudi bukai.

Matthew enggau Suziana bela pulai ngemai trofi, setipikit, selampai, jumpang enggau mata duit penyampau RM1,000.

Nitih ku penerang, Suziana Damik mega kala bulih gelar Miss Earth Sarawak 2018.

Kelimpah ari nya, seduai bisi nerima produk enggau servis berega RM2,000 ari Borneo Medispa lalu diau bemalam pengelama empat hari tiga malam di Borneo Tribal Village sereta tepa.

Penuduk lumur dua kededua kategori pekit pulai ngagai Dino Rendi Keni enggau Emillia Mujan Kayan.

BELA BAJIK, SIGAT… Bala pemekit berebutka gelar Mister enggau Miss Borneo Tribal Festival di Borneo Tribal Village (BTV), Kampung Apar, Bau berintai atas panggau.

Seduai bela nerima trofi, setipikit, selampai enggau mata duit penyampau RM800 siku.

Dino enggau Emillia mega diberi awak diau bemalam nadai bebayar pengelama tiga hari dua malam di Borneo Tribal Village sereta tepa.

Seraya Mohammad Zahid Ngamain enggau Priscillya Stevenson Satu ba penuduk ketiga nerima trofi, setipikit, selampai enggau mata duit RM600 siku.

Seduai mega diberi awak diau bemalam nadai bebayar pengelama dua hari semalam di Borneo Tribal Village enggau tepa.

NGAKUN… Pemenggi gelar Mister Borneo Tribal Festival 2019, Matthew Malong Bill nerima perais ari Datuk Peter Nansian.

Gelar bukai baka Miss enggau Mister Popular, Miss enggau Mister Borneo Medispa, Anugerah Miss enggau Mister Nyitzit Choice sereta Miss enggau Mister Photogenic ari Pure Sangon mega udah diberi ngagai bala pemekit kategori lelaki enggau indu.

Ba kategori lelaki, Zahid menggi gelar Mister Popular, Mister Borneo Medispa enggau Anugerah Mister Nyitzit Choice lalu Randy bulih gelar Mister Photogenic.

Seraya kategori indu Suziana menggi gelar Miss Borneo Medispa enggau Miss Photogenic lalu Rachael Emilia John Ahwang pulai ngemai gelar Miss Popular enggau Anugerah Miss Choice.

Pekit pemajik gamal nyadi sebagi ari isi Pengerami Tribal Borneo 2019 lalu renggat kepenudi diatur ba hari keterubah pengerami kena 7 Jun tu tadi.

Pekit tu diatur nyerumba Pengerami Tribal Borneo ti diatur di Kampung Tribal Borneo, Obut Pikatang, Kampung Apar di Singai, Bau ditu.

Pengerami berambaika jaku Let’s Go Tribal ngangkatka adat asal bansa Dayak Bidayuh ti udah dilancharka Menteri Utiliti Sarawak Datuk Seri Stephen Rudi Utom.

Pengerami tu mega bisi mandangka pemakai enggau ai irup asal, enggau produk kraf jari sereta richah enggau macham aktiviti enggau main asal baka nyabung manuk, pekit golf, main bol enggau nyumpit.

Perais bala pemenang udah disua temuai dipebasa ti nyadi Penyanding Penemu pengerami nya, ex-Adun Tasik Biru Datuk Peter Nansian enggau bini iya, Datuk Seri Stephen Rudi Utom enggau Datin Seri Loreta Sawot.

NGAKUN… Pemenggi gelar Mister Borneo Tribal Festival 2019, Matthew Malong Bill nerima perais ari Datuk Peter Nansian.

 

MISS BORNEO TRIBAL FESTIVAL 2019